Rutsiro Fc yashyiriweho igihembo gikomeye kugira ngo itsinde Rayon Sports bafitanye umukino uyu munsi
Abayobozi b’ikipe ya Rutsiro Fc bemereye igihembo cy’amafaranga agana n’ibihumbi 50 kuri buri mukinnyi n’umutoza nibaramuka batsinze ikipe ya Rayon Sports bafitanye umukino kuri uyu munsi wa kabiri wa shampiyona uzabera I Rubavu.
Aya makipe yombi azacakirana kuri uyu munsi tariki ya 3 Ugushyingo 2021 mu Karere ka Rubavu kuri Stade Umuganda Saa Cyenda z’amanywa.
Ni ku nshuro ya kane aya makipe araba agiye guhura muri shampiyona, bwa mbere bahura hari tariki 8 Gicurasi 2021 Rayon Sports itsinda Rutsiro FC ibitego 2-0, bahuye ku mukino wa kabiri tariki 11 Gicurasi banganya igitego 1-1, tariki 22 Kamena 2021 bahuye bwa gatatu Rutsiro FC itsinda Rayon Sports ibitego 2-0.
Ku munsi w’ejo nibwo Kapiteni mushya wa Rayon Sports,Muhire Kevin,yasabye abafana b’iyi kipe kwihanganira uko ikipe ihagaze bakareka kumva ibintu byo hirya no hino bigaruka ku bushobozi buke bw’abakinnyi babo.
Ati ”Abafana ba Rayon Sports icyo nababwira, turi ikipe nshyashya, ikipe itaramenyerana 100%, bakomeze bagire kwihangana natwe tuzakomeza dutange ibyo dufite byose kugira ngo dukomeze tubahe ibyishimo nk’uko babyifuza, ntibacike intege, imikino ya gicuti yarabaye tureba aho bitameze neza.”
Yakomeje kandi abasaba kwirinda amagambo y’abantu bumva hiryo no hino ahubwo baze birebere ikipe yabo, babone ubushobozi bafite.
Ati “Ndizera ko umukino ku mukino uzajya uba isomo ryo kugira ibyo dukosora mu mikino iri imbere, bakomeze badushyigikire, bareke kumva ibintu byo hirya no hino ahubwo barebe ibyo abakinnyi babo bashoboye kugira ngo babone ibyo byishimo bifuza.”