Print

Biravugwa ko RS Berkane yakodesheje indege yihariye yo kuyizana i Kigali guhangana na APR FC

Yanditwe na: Dusingizimana Remy 25 November 2021 Yasuwe: 918

Ikipe ya RS Berkane yo muri Maroc ifitanye umukino na APR FC ku cyumweru tariki 28 Ugushyingo 2021, hari amakuru avugwa ko yamaze gukodesha indege yayo yihariye (Jet Private) iyizana i Kigali.

Iyi kipe yo muri Maroc itameze neza muri shampiyona iwabo,irashaka kugera i Kigali hakiri kare kugira ngo yitegure guhangana na APR FC iri mu byishimo byo gutsinda Rayon Sports ibitego 2-1.

Ishyirahamwe riyobora umupira w’amaguru muri Afurika CAF ryamaze gushyiraho abasifuzi bazasifura umukino uzahuza ikipe y’ingabo z’igihugu APR FC na RS Berkane yo mugihugu cya Morocco.

Ni umukino ubanza wo gushakisha itike yo kujya mu matsinda y’irushanwa rya CAF Conderation Cup uzabera kuri stade ya Kigali i Nyamirambo kuri iki Cyumweru tariki 28 Ugushyingo ukazasifurwa n’abasifuzi bakomoka muri Djibouti.

Umusifuzi wo hagati yitwa Liban Abdoulrazack Ahmed mu gihe umusizi wa mbere wungirije yitwa Ahmed Djama, umusifuzi wungirije wa kabiri yitwa Rachid Waiss Bouraleh naho umusifuzi wa kane akaba yitwa Mohamed Diraneh Gued.

Ikipe y’ingabo z’igihugu ikaba yarakomeje imyitozo nyuma yo gutsinda ikipe ya Rayon Sports ibitego 2-1 mu mukino wa shampiyona uyu munsi bakaba bari bukore saa cyenda (15h00).