Kate Bashabe yerekanye ibyishimo yagiranye n’abana b’I Nyamata ,ashimira Juno Kizigenza wabasusurukije [AMAFOTO]
Igikorwa cyabereye mu kigo cy’imyidagaduro y’abana cya Summer Palace Nyamata, Kate Bashabe yasangiye n’abana bagera ku ijana ibihe by’impera z’umwaka anabagenera impano za Noheli.
Nkuko bigaragara mu mashusho anyuranye yagiye asangiza abamukurikira ku rubuga rwa Instagram, Bashabe yagiranye ibihe byiza n’abana yise abe kandi nabo byagaragaraga ko bishimiye igikorwa bakorewe, Mu butumwa bwe, uyu mushabitsi yagize ati:”Abana banjye bari kwishima bikomeye”.
Yongeyeho ubundi butumwa ashima Juno Kizigenza wamushyigikiye muri icyo gikorwa, aho yaririmbiye abana bakizihirwa mu ndirimbo zirimo ‘Nazubaye’ n’izindi. Bashabe yongeyeho ati:”Juno Kizigenza urakoze gutuma abana bagira ibyishimo, umuziki wawe ni agatangaza kandi ndi umufana wawe”.
Kate Bashabe kandi yashimye abamufashije bose harimo ‘Sawa Citi Supermarket’ yateguye amafunguro, ibinyobwa n’impano yahaye abana, umushyushyarugamba ‘Regy Bank’ kimwe na Summer Palace Nyamata yabakiriye ikemera ko bahagirira ibihe byiza.
Kate Bashabe ubusanzwe yatangiye kwamamara mu ruhando rw’imyidagaduro akiri muto cyane ubwo yegukanaga ikamba rya Nyampinga wa MTN Rwanda mu 2010, aza gukomeza kugenda yaguka mu bijyanye n’ubucuruzi bushingiye ku mideli, ubugeni n’ubuhanzi nyafurika binyuze muri ‘Kabash Brands’.
