Havuzwe indi mpamvu itari Covid-19 yatumye abatoza ba APR FC batayitoza I Ngoma
Kuri uyu wa Gatatu tariki ya 22 Ukuboza 2021,ikipe ya APR FC yasuye Etoile de l’Est i Ngoma mu mukino w’umunsi wa 10 wa shampiyona ariko iyi kipe yakinnye uwo mukino idafite abatoza bayo hafi ya bose bitewe n’uburwayi bari bafite.
Mbere gato y’umukino,amakuru yakwirakwijwe ku mbuga nkoranyambaga yavuze ko aba batoza basanganwe Covid-19.
Umutoza w’abazamu Alexis Mugabo ari nawe watoje uyu mukino afatanyije na kapiteni wa APR FC,Jacques Tuyisenge,yavuze ko aba batoza batarwaye Covid-19 nkuko byavuzwe ahubwo barwaye mu nda.
Ati “ Abatoza ba APR FC barwaye mu nda niyo mpamvu batabonetse ku mukino.”
Amakuru akomeje kwemeza ko aba batoza ba APR FC ari ukuri banduye Covid-19 kimwe n’abakinnyi 5.
Nubwo ubuyobozi bwa APR FC butarabyemeza ariko amakuru aravuga ko Umutoza mukuru n’abungiriza be 2 ngo banduye COVID-19 hamwe n’abakinnyi bagera kuri 5.
Jacques Tuyisenge na Mugabo Alexis ejo bakuye inota kuri Etoile De L’Est ya Camarade yari yabazonze ibabanza ibitego 2-0 mu minota 10 ya mbere y’umukino ariko baza kubyishyura babifashijwemo na Mugunga na Bizimana Yannick.
Ikipe ya APR FC yihariye umupira cyane ndetse inabona uburyo bwinshi butandukanye bwari kuyiha ibitego ariko ntabyayikundiye kubona intsinzi nubwo yakozee agahigo gashya ko kumara imikino 43 idatsindwa.