Ba banya Maroc baheruka gutandukana na Rayon Sports baraye basubijwe iwabo
Mu ijoro ryo kuri uyu wa Mbere tariki ya 17 Mutarama 2021, nibwo abakinnyi 2 b’abanya-Maroc bari intizanyo ya Raja Casablanca muri Rayon Sports, Ayoub Ait na Rharb Youssef basubiye iwabo.
Ku wa Gatanu w’icyumweru gishize tariki ya 14 Mutarama 2022,nibwo Rayon Sports yatangaje ko aba bakinnyi bari batijwe n’iyi kipe binyuze mu bufatanye bagiranye tariki ya 19 Nyakanga 2021 bagomba gusubira mu ikipe yabo.
Byabaye nyuma y’uko aba bakinnyi bari batangarije itangazamakuru ry’iwabo ko mu Rwanda babayeho nabi.
Rayon Sports yari yatijwe rutahizamu Rharb Youssef na mugenzi we bakiniraga Raja Casablanca yo muri Maroc ku masezerano y’umwaka umwe ku wa 26 Nzeri 2021.
Ibi bivuze ko urugendo rwa Youssef na Ayoub rurangiye kuri uyu wa Gatanu tariki ya 14/01/2022.
Kuwa 13 Mutarama 2022,aba bakinnyi batangarije ikinyamakuru cy’iwabo muri Maroc, Sport 1 ko aho bari mu Rwanda bameze nk’abari muri gereza, babayeho nabi ndetse bamaze amezi 2 badahembwa.
Youssef yagize ati “Nta kindi dutekereza uretse ubuzima bwacu, ntabwo dusinzira, kuva twagera inaha baduha ibiryo bimwe buri munsi, hashize amezi 2 tudahembwa, ariko turagerageza gutanga ibyo dufite ku mikino dukina kugira ngo dusubire ku rwego rwiza.”