Print

Rayon Sports na APR FC zatsinze imikino yazo ya shampiyona mbere yo kwesurana mu mukino wo kwishyura

Yanditwe na: Dusingizimana Remy 21 February 2022 Yasuwe: 1577

Amakipe y’ibigugu mu Rwanda ariyo Rayon Sports na APR FC yatsinze imikino yazo y’umunsi wa 18 wa shampiyona,mbere y’uko zesurana kuwa Gatandatu tariki ya 26 Gashyantare ,mu mukino utegerejwe na benshi.

Ikipe ya Rayon Sports idahagaze neza mu gutsinda ibitego,yongeye gutsinda ku nshuro ya kabiri yikurikiranya igitego 1-0 mu mukino yari yasuyemo Bugesera FC.

Rayon Sports yatsinze Bugesera FC igitego 1-0 cyatsinzwe na Musa Essenu ku munota wa 30 n’umutwe ku mupira mwiza yahawe na Muhire Kevin.

Rayon Sports yaje kubona penaliti ku munota wa 51 w’umukino ubwo umukinnyi wayo yategerwaga mu rubuga rw’amahina ariko Kwizera Pierrot ayitera hanze.

Icyakora yakuye amanota yose mu Bugesera mbere yo kwakira APR FC ku wa Gatandatu.Rutahizamu wayo Essenu amaze gutsinda ibitego 2 mu mikino 3.

Mu wundi mukino ukomeye,ikipe ya APR FC yatsinze ibitego 2-0 Etincelles FC mu mukino wabereye kuri stade ya Kigali i Nyamirambo.

Ibi bitego byose byinjiye mu gice cya mbere bitsinzwe na Djabel Manishimwe ku munota wa 40 na Kwitonda Alain Bacca ku munota wa 45.

Ikipe ya Musanze FC yaherukaga gutsinda APR FC,yakomeje gutanga ibyishimo ubwo yatsindaga ibitego 2-0 bwa Etoile De L’Est.

Nkuko yabigenje aha ibyishimo abanya Musanze imbere ya APR FC,Imran Nshimiyimana yabahaye amanota nanonye nyuma yo kubatsindira ibi bitego byombi byinjiye ku munota wa 6,70.

Uko imikino yose y’umunsi wa 18 yagenze:

AS Kigali 2-0 Gorilla FC
Mukura VS&L 1-0 Marines FC
Gicumbi FC 1-1 Espoir FC
Rutsiro FC 2-1 Gasogi United
Police FC 0-1 Kiyovu SC
APR FC 2-0 Etincelles FC
Bugesera FC 0-1 Rayon Sports FC
Musanze FC 2-0 Etoile de l’Est FC

Urutonde rwa shampiyona nyuma y’umunsi wa 18:

1. APR FC 40 Pts
2. KIYOVU Sports 38 Pts
3. MUKURA 32 Pts
4. Rayon Sports 32 Pts
5. AS Kigali 30 Pts
6. Musanze FC 30 Pts
7. Police FC 26 Pts