Kenya yabaye igihugu cya mbere mu karere gikuyeho kwambara agapfukamunwa mu ruhame
Igihugu cya Kenya,cyabaye icya mbere mu karere gikuyeho itegeko ryo kwambara agapfukamunwa ahahurira abantu benshi nyuma y’uko icyorezo cya Covid-19 kigabanyije ubukana ku isi.
Ku wa kane,Umunyamabanga w’inama y’igihugu y’ubuzima muri Kenya, Mutahi Kagwe, yatangaje ko kwambara agapfukamunwa ku karubanda [mu mihanda n’ahandi hose hafunguye] byavanyweho kandi gusengera hamwe ku bantu bafashe inkingo byemewe.
Bwana Kagwe yashishikarije Abanyakeny kwambara udupfukamunwa ahantu hafunze,bakanubahiriza amategeko yo gusiga umwanya hagati y’umuntu n’undi. Yavuze kandi ko akato kazahagarikwa.
Ati: “Abanyakenya bashishikarijwe kwambara udupfukamunwa mu gihe bitabiriye ibikorwa bibera mu mazu [ahafunganye. Tugomba noneho gukora igenzura ry’ubushyuhe ahantu hahurira abantu benshi ”, akomeza avuga ko ibikorwa bihuriza abantu bose mu mazu bizakomeza kandi bikakira 100% by’abo byakira.
Bwana Kagwe mu kiganiro n’abanyamakuru i Nairobi, yavuze kandi ko ingamba za Covid-19 zabayeho mu myaka ibiri ishize zafashije kandi zikiza abantu ibihumbi.
Ati: “Ingamba zacu dufatanije n’intara zarokoye ubuzima. Dushingiye ku nama za OMS, twari dufite virusi kandi nk’uko mubibona mu kwezi gushize, umubare w’abanduye uri munsi ya rimwe ku ijana. ”
Kubera izi ngamba cya Leta ya Kenya yafashe, ibikorwa bya siporo bigiye gukomeza abafana basubire ku bibuga batambaye udupfukamunwa.
