Print

Umunyezamu wa 2 wa Real Madrid yishimiye kubanza mu kibuga bwa mbere ava mu kibuga ajya gusoma umugore we

Yanditwe na: Dusingizimana Remy 9 May 2022 Yasuwe: 1173

Mu mukino uzwi nka "Madrid Derby" utari ufite akamaro kubera ko Real Madrid yamaze gutwara igikombe,umunyezamu wayo wa 2, Andriy Lunin yabanje mu kibuga bwa mbere muri shampiyona ya La Liga yose,ibyishimo biramurenga niko gusanga umugore we muri stade umukino urangiye aramusoma biratinda.

Lunin niwe wenyine wari wahawe icyizere mbere y’abandi bose ko ari bubanze mu kibuga mbere y’umunsi ngo umukino ube, nkuko Ancelotti ubwe yabivuze mu kiganiro n’abanyamakuru cyabanjirije umukino kuwa Gatandatu ati "Lunin azatangira mu kibuga kuri derby, nzahitamo abasigaye ejo".

Uyu munya Ukraine yakuyemo ishoti rimwe ryashoboraga kubyara igitego nijoro, ariko yakijije igitego cyari gitsinzwe na Matheus Cunha wari winjiye mu rubuga rw’amahina nyuma y’uko Atletico Madrid yari yibye umugono Real Madrid.

Ishoti rya Cunha ntiryari ryiza, ariko Lunin yarikuyemo neza ndetse muri rusange yitwaye neza nubwo Real Madrid yatsinzwe igitego 1-0 kuri Penaliti yatsinzwe na Carrasco nyuma y’uko Jesus Vallejo ategeye mu rubuga rw’amahina Matheus Cunha.

Lunin birashoboka ko azakomeza kubona umwanya wo gukina mu mikino itatu iri imbere, kandi bizaba bishimishije kubona uko yitwara cyane ko Courtois yamutwaye umwanya burundu.

Icyakora ku mbuga nkoranyambaga hari kuzenguruka ifoto ye ari gusomana n’uyu mugore we bashyingiranwe yambaye imyenda ya siporo.