DRC: imitwe 4 yarambitse intwaro,intambwe ku masezerano y’amahoro
Mu ntara nya kivu y’Amajyaruguru muri Repuburika ya Demokarasi ya Congo(DRC) imitwe yitwaje intwaro igera kuri ine yemeye kurambika ibirwanisho no kutongera kugaba ibitero ukundi.
Iyi mitwe yabigezeho nyuma yo gusinyana masezerano y’amahoro hagati yabo ko batazongera gushyamirana ukundi, mu nama y’iminsi 2 yahuje intumwa 8 z’iyi mitwe.
Iyi myanzuro yasinywe kuri uyu wa 9 gicurasi 2022 I Pinga iherereye Cheval hagati ya Walikale na Masisi muri (Nord-Kivu).
Amasezerano yo guhagarika ubushyamirane aje nk’igisubizo ku nama z’abakuru b’ibihugu Felix Tshisekedi na mugenzi we wa Kenya, Uhuru Kenyata baherutse guhamagarira iyi mitwe yitwaje intwaro muri Ituri, mu majyaruguru na majyepfo ya Kivu kurambika intwaro ku bushake bagaharanira amahoro mu Gihugu cyabo mu kwezi gushize.
Imitwe yateye intambwe y’amahoro ihagarariwe na Janvier Karahiri wa Alliance des patriotes pour un Congo libre et souverain (APCLS), ikorera Masisi, Guidon Mwissa wa Nduma defense of Congo (NDC-Rénové) iWalikale, Sanctus Domi wa Collectif des mouvements pour le changement (CMC-Nyatura) na Jean Marie Nyamuganya wa Nyatura Bazungu.
Avuga kuri iki gikorwa umuyobozi w’abaturage muri Pinga/Bushimoo yavuze ko intambwe yambere yo kugarura amahoro mu burasira n’uburengerazuba bwa Congo yaterewe I Nairobi ku bufatanye na perezida w’iki gihugu cya Kenya.
Guverinoma ya Congo yahise isaba indi mitwe kwigira kuri bagenzi babo bagashyira intwaro hasi kugirango bafatanye n’igisirikare cy’igihugu FARDC kugarura amahoro arambye no guharanira ubusugire bw’igihugu.