Ingorane za DRC ni ubutegetsi bujegajega kuva kera “imboni za Reytjens”
Kimwe mu bintu nyamukuru bituma Repubulika ya Demokarasi ya Congo ihora mu ntambara zidashira n’ubutegetsi bwayo bujegajega.
Abategetsi ba Congo ngo ntibashobora gushyira ku murongo inzego zabwo nko kugenzura ubutaka no kubungabunga ubusugire bw’igihugu.
Ibi byavuzwe n’umwarimu wa Kaminuza Filip Reytjens, umuhanga mu karere k’ibiyaga bigari by’Afrika akaba n’umushakashatsi w’umubirigi.
Uyu yabwiye BBC, ko izi ngorane z’ubutegetsi zisanzwe zihari kuva ku butegetsi bwa Mobutu.
Ati: “Mobutu kuva mu myaka y’ 1970, yagiye asenya iki gihugu bukebuke kugeza ubwo kitashoboye kwiha umurongo uhamye kuva kera”.
Abona ko uku kujegajega k’ubutegetsi bwa Congo kwigaragariza kandi no mu gisirikare cyayo.
Kuva intambara yo mu mwaka wa 1996-1997 yahiritse Mobutu Sese Seko ku butegetsi yari amazeho imyaka irenga 30 yaba, Repubulika ya Demokarasi ya Congo (RDC/DRC) yahoze yitwa Zaïre, ntirongera kubona amahoro.
Kuva icyo gihe, iki gihugu cyo mu karere k’ibiyaga bigali cyahoze kirangwamo intambara, cyane cyane mu ntara zo mu burasirazuba, ahavugwa ubu imitwe irenga 100 yitwaje intwaro ikomeje guhungabanya umutekano w’abanyagihugu.