Umukinnyi usatira aca ku ruhande ukomoka muri Brazil,Vinicius Jr, watsinze ibitego 22 mu mikino 52 yakinnye mu mwaka w’imikino ushize, yiteguye gusinya amasezerano mashya y’imyaka ine muri Real Madrid kugeza 2026.
Uyu rutahizamu wihuta cyane,yageze I Santiago Bernabeu mu mpeshyi ya 2018 ku giciro cya miliyoni 46 z’amayero, aba Umunya Brazil wa 19 wambaye w’iyi kipe izwi cyane.
Mu myaka ishize, Los Blancos yungukiye mu bakinnyi beza bakomoka muri Brazil, ari nayo mpamvu Vinicius yemeje ko ariyo ituma bishimira gukinira Real Madrid.
Yatangarije ukora kuri You Tube witwa DJMariio ati: "Gukinira Real Madrid byahoze ari inzozi zanjye.Abana bose bo muri Brazil barota gukina hano, kubera ko Abanya Brazil benshi batwaye ibikombe hano kandi ndashaka kwandika amateka nkabo. Tugomba gukora kuri ibyo."
Real Madrid ishobora gushimira abanya Brazil batanu bayikoreye akazi gakomeye mu mwaka w’imikino ushize barimo Henrique Casemiro, Vinicius Junior, Rodrygo Goes, Eder Militao na Marcelo - mu gihe amazina nka Roberto Carlos, Kaka, Ronaldo Nazario na Robinho atazibagirana mu mateka y’iyi kipe y’inyabigwi muri La Liga no ku isi.