Perezida Kagame na Madamu we bagiye gushyigikira umuhungu wabo warangije amasomo ya gisirikare [AMAFOTO]
Perezida Kagame na Madamu Jeannette Kagame bitabiriye ibirori byo kurangiza amasomo k’umuhungu wabo Ian Kagame, mu Ishuri rya Gisirikare ry’Ubwami bw’u Bwongereza, Royal Military Academy.
Uyu muhungu wabo yahawe ipeti rya Sous Lieutenenant we n’abandi Banyarwanda babiri Park Udahemuka na David Nsengiyumva.
Umuhango wo guha aba basirikare amapeti wabereye i Sandhurst mu Bwongereza mu gitondo cyo kuri uyu wa Gatanu, tariki ya 12 Kanama 2022.
Perezida Kagame yakiriwe mu cyubahiro kigenerwa Umukuru w’Igihugu ndetse hanaririmbwa indirimbo yubahiriza igihugu.
Ian Kagame yahawe ipeti mu gisirikare mu gihe mu 2019 nabwo yari yasoje amasomo ye y’Icyiciro cya Gatatu cya Kaminuza, agahabwa Masters mu Bukungu yakuye muri Kaminuza ya Williams College yo muri Leta Zunze Ubumwe za Amerika.
Abarangije amasomo barimo 208 bo mu Bwongereza n’abandi 41 bo mu mahanga baturutse mu bihugu 26.
