Mu masaha y’umugoroba wo kuri uyu wa Gatanu tariki ya 10 Gicurasi,abagizi ba nabi bataramenyekana bateye gerenade ahahoze Isoko Rikuru rya Bujumbura gihitana abantu barenga 3 abandi benshi barakomereka.

Sponsored Ad

Gerenade ya kabiri yaturikiye ahari hateraniye abapolisi bashinzwe kurinda ibigo, muri zone ya Ngagara (mu majyaruguru y’umujyi wa Bujumbura).

Byibuze abantu batatu bapfuye abandi 14 barakomereka mu guturika kw’iyi grenade yatewe ahahoze Isoko Rikuru rya Bujumbura nkuko amakuru y’abashinzwe umutekano yabitangaje.

Abatangabuhamya babwiye SOS Media Burundi bati: “Imodoka nyinshi za polisi ziri kuzenguruka mu mujyi rwagati kandi imihanda myinshi yafunzwe n’abapolisi.”

Nyuma y’iki gitero, imodoka nyinshi z’abashinzwe umutekano zahise zigota aho cyabereye ndetse n’imihanda imwe n’imwe irafungwa, mu gihe iperereza ryahise ritangizwa kugira ngo hamenyekane ibyabaye muri rusange.

Perezida Evariste Ndayishimiye yasezeranyije ko abagize uruhare muri iki gitero bazafatwa kandi bakoherezwa imbere y’ubutabera, gusa amakuru y’abakigizemo uruhare ntabwo arajya hanze.

Abinyujije kuri X yagize ati: "Turahojeje vy’imvamutima abakomerekeye mu gitero c’iterabwoba gihejeje kubera ahahoze hari isoko nkuru ya Bujumbura.

Bene Burundi, ni mugumye umutima, iterabwoba ntiryigeze ritsinda amahoro !
Bitebe bitebuke, ababikora bazofatwa bakubitwe intahe mu gahanga.
Imana ni yo nkuru."

U Burundi bumaze iminsi bwibasirwa n’ibitero byakunze kugabwa n’umutwe wa RED-Tabara, icyakora kugera mu masaha y’umugoroba, ntabwo wari wakigamba iki gitero gifite igisobanuro gikomeye cyane, dore ko cyagabwe mu Mujyi ahantu hahurira abantu benshi.