Umukinnyi wa Man City,Phil Foden yatowe nk’umukinnyi mwiza kurusha abandi mu Bwongereza mu mwaka w’Imikino 2023/2024 n’Ishyirahamwe ry’abanditsi b’umupira w’amaguru muri iki gihugu.

Sponsored Ad

Uyu mukinnyi wo hagati ariko usatira muri Manchester City yatsinze ibitego 24 bifasha gushyira ikipe ye mu nzira nziza yo kwegukana Premier League na FA Cup muri uyu mwaka w’imikino.

Kwitwara neza kwahawe agaciro n’ishyirahamwe rya FWA kuko yatowe nk’umukinnyi w’umwaka nabo ku majwi angana na 42%.

Yahigitse Umwongereza mugenzi we, Declan Rice,nawe wagize umwaka mwiza muri Arsenal aribwo ayigezemo.

Mugenzi wa Foden witwa Rodri – umaze amezi 15 ataratsindwa mu mukino yakinnye yaje ku mwanya wa gatatu.

Kapiteni wa Arsenal,Martin Odegaard, Ollie Watkins wa Aston Villa na Cole Palmer nibo bakurikiyeho.

Foden abaye umukinnyi wa gatatu wa City utwaye iki gihembo nyuma ya Ruben Dias muri 2021 na Erling Haaland umwaka ushize.

Mu bagore,iki gihembo cyahawe rutahizamu wa Man City,Khadija Shaw w’imyaka 27, akurikirwa na Lauren James wa Chelsea.Aba bombi bihariye 80% by’amajwi.

Abandi bakinnyi bahawe amajwi ni:Virgil Van Dijk, Mo Salah, Bukayo Saka, Bruno Guimares, Bruno Fernandes, Bernardo Silva, John McGinn, Ross Barkley, Alexis Mac Allister, Diogo Dalot, Son Heung Min na Jarrod Bowen.

Iki gihembo kizatangwa mu birori biteganyijwe kuwa 16 Gicurasi.