Imvura nyinshi yateye imyuzure mu bice byinshi byo mu murwa mukuru wa Kenya, Nairobi, mu ijoro ryo kuri uyu wa gatatu.

Sponsored Ad

Ishami ry’ishyirahamwe mpuzamahanga rishinzwe gutabara, OCHA, ryavuze ko abantu batari munsi ya 32 bapfuye, mu gihe abandi barenga 40.000 bavuye mu ngo zabo kubera iyi mvura n’imyuzure.

Ibiro ntaramakuru mu Bufaransa, AFP, byatangaje ko uruzi Athi, rwa kabiri mu burebure muri Kenya, rwuzuye rurenga inkombe zarwo. Amazi yarenze inkombe y’urwo ruzi yabujije imodoka kugenda.

Ishami mpuzamahanga rishinzwe gutabara, Croix Rouge, rikorera muri Kenya, mu butumwa ku rubuga X, ryavuze ko imihanda n’ibiraro byugarijwe n’imyuzure.

Byatumye imodoka ziba nyinshi mu mihanda mikuru. Iryo shyirahamnwe ryatangaje ko abashinzwe gutabara bari kwimurira imiryango mu bice bitugarijwe n’iyo myuzure.

Ishyirahamwe rya za magari ya moshi muri Kenya ryatangaje ko ryabaye rihagaritse gutwara abantu. Ryavuze ko imvura idasanzwe yibasiye inzira izo gari ya moshi zikoresha. Ibice bitari bike byo muri Kenya no mu karere ko muri Afrika yo mu burasirazuba byugarijwe n’imvura idasanzwe yaguye mu cyumweru gishize. (AFP)

Forum