Lionel Messi yaciriye uduhigo dutandukanye ku kipe ya Liverpool, nyuma yo kuyitsinda ibitego bibiri muri 3-0 FC Barcelona yayitsinze mu mukino ubanza wa 1/2 cy’irangiza cya UEFA Champions league.

Sponsored Ad

Ibitego bibiri bya Messi byo ku munota wa 75 n’uwa 81 ni byo byahesheje FC Barcelona amahirwe menshi yo kugera ku mukino wa nyuma wa Champions league.

Ibi bitego bibiri byatumye Messi aca agahigo ko kuba yujuje ibitego 600 amaze gutsindira FC Barcelona, na 665 amaze gutsinda muri rusange. Byatumye kandi akomeza kuyobora abatsinze ibitego byinshi muri Champions league aho yujuje ibitego 12. Ni ibitego yatsinze mu mikino icyenda.

Biriya bitego kandi byatumye Liverpool ijya mu gatebo kamwe n’andi makipe yose yo mu Bwongereza yibasiwe bikomeye na Messi. Mu busanzwe Liverpool yari ifite agahigo ko kuba itaratsindwa igitego n’uyu musore gusa kavuyeho. Iyi kipe y’umutoza Jurgen Klopp yashyizwe mu gatebo kamwe n’amakipe ya Arsenal, Manchester City, Manchester United, Chelsea na Tottenham.

Izi kipe zose Messi amaze kuzitsinda ibitego 26 wenyine mu mikino 33 yahuye na zo.

Messi kandi yujuje Coup-Franc ya munani amaze gutsinda muri uyu mwaka w’imikino. Ni bwo bwa mbere abashije kubikora kuva yatangira gukina ruhago.

Lionel Messi kandi yaciye agahigo ko kuba umukinnyi ushoboye gutsinda ibitego amakipe atatu yo mu Bwongereza mu mwaka umwe w’imikino. Yatsinze Tottenham, atsinda Manchester United none yasubiye na Liverpool. Aka gahigo agasamgiye na Thomas Mueller washoboye gutsinda Arsenal, Man City na Man United muri 2013-14.