Perezida wa Madagascar, Andry Rajoelina, yavuze ko aho kwikingiza Coronavirus akoresheje inkingo zimaze kwemezwa ku rwego mpuzamahanga, azanywa umuti witwa Covid Organic wakorewe mu gihugu cye kuko nawo ushoboye.

Sponsored Ad

Uyu muti wa Madagascar uvugwa ko uvura Coronavirus, wakozwe mu kimera kitwa nka Artemisia gisanzwe gikorwamo umuti uvura Maralia. Ishami ry’Umuryango w’Abibumbye ryita ku Buzima, OMS, kugeza ubu ntirirawemeza nk’umuti uvura Covid-19.

Nubwo ariko uyu muti utaremezwa, 7sur7 itangaza ko kuri uyu wa Gatandatu Rajoelina yavuze ko ari wo azanywa aho kwiteza urukingo.

Ati “Ku giti cyanjye ntabwo ndikingiza kandi ntabwo mbiteganya. Umuti w’igitangaza wa Covid Organic wakozwe muri Artemisia, ubu uri gukorwamo ibinini, uzandinda njye n’umuryango wanjye.”

Yongeyeho ko we na leta ayoboye badahakana urukingo, ahubwo ko bakiri mu igenzura ryarwo kubera ko rugifite izindi ngaruka rutera umuntu waruhawe.

Umuryango utegamiye kuri Leta uharanira uburenganzira bwa muntu, Amnesty International, ukomoka mu Bwongereza, wanenze bikomeye ibyo Perezida wa Madagascar yatangaje, uvuga ko ari uguhonyora uburenganzira bw’abaturage ba Madagascar ababuza amahirwe yo gukingirwa.

Perezida Rajoelina aherutse gutangaza ko mu gihugu cye hageze ubwoko bushya bwa Coronavirus, bikekwa ko bwaba bufitanye isano n’ubwabonetse muri Afurika y’Epfo. Ndetse ko nubwo mu kwezi gushize iki gihugu cyagize ubwandu bushya bungana na 2,483 n’impfu 48, iyi mibare idateye ubwoba.

Kugeza ubu muri iki gihugu abantu 345 bamaze guhitanwa n’icyorezo cya Coronavirus mu gihe abangana 22 275 bayanduye.