Inzego z’umutekano muri Zimbabwe zatangaje ko umuntu wa mbere wakekwagaho ubwandu bw’icyorezo cya coronavirus wari ugiye gusuzumwa, yatorotse ibitaro adasuzumwe.

Sponsored Ad

Muri iki gihugu nta muntu n’umwe biremezwa ko ayirwaye, ariko Minisiteri y’ubuzima yatangaje ko hari umugabo wo muri Thailand watorotse akekwaho kuba yarayanduye.

Uwo mugabo w’imyaka 26 yageze muri Zimbabwe muri Gashyantare uyu mwaka, yoherezwa mu bitaro byigenga bya Wilkens Infectious Disease Hospital afite umuriro n’ibicurane.

Nubwo atagaragazaga ibimenyetso byose by’abarwayi ba Coronavirus, Minisiteri y’Ubuzima yatangaje ko yagombaga kubanza gusuzumwa kugira ngo barebe niba atarwaye.

Polisi ya Zimbabwe yatangiye iri gushakisha uwo mugabo kugira ngo asubizwe mu bitaro.

Imibare igaragaza ko abagera ku ijana aribo bamaze kwandura coronavirus muri Afurika. Barimo 55 bo mu Misiri, 20 muri Algeria, barindwi muri Afurika y’Epfo, batanu muri Tunisia, bane muri Senegal, babiri muri Maroc, babiri muri Cameroun, babiri muri Burkina Faso, babiri muri Nigeria n’umwe muri Togo.