Ubuholandi: Umugabo araregwa gufunga umuryango we ngo bategereze imperuka

Amakuru   Yanditswe na: Dusingizimana Remy 17 October 2019 Yasuwe: 1481

Umugabo yatawe muri yombi nyuma yaho umuryango w’abantu utahuwe uhishwe mu rwuri rwitaruye mu Buholandi, ashinjwa kuba yari abafunze bo batabishaka, nkuko abashinjacyaha babivuga.



Umugabo ucyekwa w’imyaka 58 y’amavuko, yatangajwe muri ako gace ko yitwa Josef B, aragezwa mu rukiko kuri uyu wa kane.

Yatawe muri yombi ku wa kabiri kubera kudafasha polisi ku byo yamubazaga ubwo yasakaga inzu irimo muri urwo rwuri mu ntara ya Drenthe.

Abashinzwe umutekano bageze kuri uwo muryango nyuma yaho umuhungu mukuru atumije inzoga ku kabari ko mu cyaro kiri hafi aho.

Uwo muhungu, watangajwe ko yitwa Jan, ntabwo yari ari muri urwo rwuri ruri hafi y’icyaro cya Ruinerwold ubwo iryo sakwa ryakorwaga.

Polisi yahasanze abo bavukana bakuru batanu ndetse n’umugabo babwiye abashinzwe umutekano ko ari we se.

Polisi ntabwo iremeza iyo myaka y’amavuko y’uwo mugabo cyangwa uwo mwirondoro we, ndetse yabwiye BBC ko icyo kibazo iri kugerageza kugishakira igisubizo.

Undi mugabo, amakuru avuga ko akomoka muri Autriche bivugwa ko yitwa Josef B, na we yasanzwe muri urwo rwuri atabwa muri yombi.

Nubwo aho aba ahakodesha, polisi ntabwo izi isano afitanye n’uwo muryango.

Abashinjacyaha bo mu Buholandi bavuze ko ucyekwa byemezwa ko yagize uruhare "mu bikorwa bitemewe n’amategeko byo kubuza abandi ubwisanzure no kubangamira ubuzima bwabo".

Biteganyijwe ko yitaba umucamanza ukora iperereza kandi abashinjacyaha bavuze ko bari gushaka ko aba akomeje gufungwa.

Inzu ebyiri zifitanye isano n’iperereza ku munsi w’ejo ku wa gatatu zarimo zisakwa na polisi mu cyaro cya Zwartsluis, kiri kuri kilometero 16 mu majyepfo ashyira uburengerazuba bw’uru rwuri rw’i Ruinerwold.

Uwo muryango watahuwe gute?

Byabaye amayobera ubwo umukuru muri abo bana, bafite hagati y’imyaka 18 na 25, yageraga ku kabari kari i Ruinerwold agatumiza inzoga, nyuma akaza gusaba ny’ir’akabari ubufasha.

Chris Westerbeek, nyir’ako kabari, yasobanuye uburyo umugabo yahageze, agatumiza amacupa atanu agahita ayahirika nkuko byatangajwe na televiziyo RTV Drenthe.

Westerbeek yagize ati: "Nuko mpita nganira na we ampishurira ko yatorotse kandi ko acyeneye ubufasha... duhita duhamagara polisi".

Yongeyeho ati: "Yari afite umusatsi muremure, ubwanwa bwanduye, yambaye imyenda ishaje ndetse agaragaza guhuzagurika.

Yavuze ko atigeze na rimwe agera mu ishuri kandi ko hashize imyaka icyenda atiyogoshesha".

Nyuma byaje kumenyekana ko Jan yari amaze igihe akoresha konti nyinshi ku mbuga nkoranyambaga, ashyira amafoto atari meza kuri Facebook agaragaza icyaro cya Ruinerwold mu ntangiriro y’uku kwezi.

Polisi yagiye kuri urwo rwuri ihasanga batanu bavukana n’uwo mugabo, ndetse n’undi mugabo n’uwo ucyekwa w’imyaka 58.

Mu itangazo polisi yasohoye ku wa kabiri yagize iti: "Twasanze abantu batandatu baba mu cyumba gito mu nzu yashoboraga gufungwa ariko ntabwo cyari icyumba cyo hasi [’basement’].

Ntabwo bizwi niba barahabaga ku bushake".

Amakuru yo mu bitangazamakuru byaho yavuze ko Josef B ari umuntu ukora ibiraka byo gusana mu ngo zaho.

Roger de Groot, umuyobozi w’ako karere, ku wa kabiri yabwiye abanyamakuru ati: "Ntabwo nari narigeze na rimwe mbona ibintu nk’ibi".

Yahishuye ko bamwe mu bagize uwo muryango batari banditswe nk’abaturage b’ako karere ndetse ko uwo ucyekwa w’imyaka 58 atari se w’abo bana.

Inkuru ya BBC

Author : Dusingizimana Remy

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Abarwanya Perezida Museveni bari gusinya impapuro zo kumurega muri...

Abarwanya Perezida wa Uganda Yoweri Kaguta Museveni bibumbiye mu kizwi nka...
12 November 2019 Yasuwe: 1813 0

Muri Zimbabwe hashyizwe hanze inoti nshya mu rwego rwo kugabanya ibura...

Banki Nkuru ya Zimbabwe yatangaje ko kuri uyu wa 11 Ugushyingo iraza...
11 November 2019 Yasuwe: 1167 0

FARDC yafatanye impapuro zirimo amabanga akomeye Gen.Afurika wayoboraga...

Kuwa Gatandatu taliki ya 09 Ugushingo 2019 nibwo FARDC yatangaje ko yishe...
11 November 2019 Yasuwe: 4886 0

Abanya Kenya barasaba ko bamwe mu bayobozi bafungwa kubera icuruzwa...

Iperereza rya televiziyo NTV yo muri Kenya ryerekanye ko kudakurikirana...
11 November 2019 Yasuwe: 1413 0

Bolivia: Perezida Morales wari umaze imyaka 14 ku butegetsi yegujwe...

Perezida Evo Morales wa Bolivia yeguye ku butegetsi yari amazeho imyaka 14...
11 November 2019 Yasuwe: 860 0

Umwarimu wo mu Burusiya yemeye ubwicanyi asanganywe amaboko y’umugore mu...

Umwarimu w’amateka wa kaminuza uzwi cyane wo mu Burusiya yemeye ko yishe...
10 November 2019 Yasuwe: 1948 0