Komisiyo y’umuryango wa Afurika Yunze Ubumwe (AU) ishinzwe amahoro n’umutekano yavuze ko yashimye ubwitange bw’Ingabo za SADC, ziri mu Burasirazuba bwa RDC,gufasha iki gihugu guhangana na M23.

Sponsored Ad

Ni icyemezo cyafatiwe mu nama yifashishije ikoranabuhanga rihuza amashusho, yayobowe n’Umuyobozi Mukuru w’aka kanama, Ambasaderi Emilia Mkusa ukomoka muri Namibia.

Yitabiriwe n’abandi barimo Dr Saljoh Bah uyobora ishami rishinzwe gukemura amakimbirane muri AU, Simon Badza uri mu bagize aka kanama na Minisitiri w’Ububanyi n’Amahanga wa RDC, Christophe Lutundula.

Abagize aka kanama “bamaganye bakomeje” imitwe yitwaje intwaro yose ikorera mu Burasirazuba bwa RDC, irimo M23, FDLR na ADF, basaba ko imirwano iri kubera muri iki gihugu ihagarara, iyi mitwe yose ikarambika intwaro.

Aka kanama katangaje ko abakagize bashyigikiye ku mugaragaro ubutumwa bw’ingabo za SADC muri RDC buzwi nka ‘SAMIDRC’, bashimira Tanzania, Afurika y’Epfo na Malawi byatanzemo umusanzu.

Katangarije ku rubuga X kati “Akanama ka AU kashyigikiye ku mugaragaro ubutumwa bwa SAMIDRC. Kahaye icyubahiro Malawi, Tanzania na Afurika y’Epfo n’ubwitange bw’ingabo za SAMIDRC.”

Ubutumwa bwa SADC mu burasirazuba bwa RDC bwatangiye tariki ya 15 Ukuboza 2023. Afurika y’Epfo ibuyoboye yiyemeje koherezayo abasirikare 2900 kugeza mu mpera z’umwaka wa 2024.

U Rwanda rwatanze umuburo ko izi ngabo za SADC zikorana n’umutwe w’iterabwoba wa FDLR ndetse zigiye gutiza umurindi RDC n’u Burundi abaperezida babyo bitangarije ko bashaka guhirika ubutegetsi mu Rwanda.

Minisitiri w’Ububanyi n’Amahanga n’Ubutwererane mu Rwanda, Dr Vincent Biruta, mu ibaruwa yo ku wa 3 Werurwe 2024 yandikiye Perezida wa Komisiyo ya AU, Moussa Faki Mahamat, yagaragaje ko ubu butumwa bwa SADC ari ikibazo ku mutekano w’u Rwanda.

Yavuze ko aho gushakira ibisubizo ibibazo nyamukuru bitera intambara mu Burasirazuba bwa RDC,izi ngabo zigiye kwitabaza intambara kandi ishobora kugira ikibazo ku karere.

Yavuze ko ikibazo cy’umutekano muke mu Burasirazuba bwa RDC kimaze imyaka isaga 30 nyuma y’uko Interahamwe zakoze jenoside zihahungiye ntizamburwe intwaro ahubwo leta ya Zaire byatumye zibiba ingengabitekerezo ya Jenoside iri gukora ishyano ubu kuko hari ubwicanyi bukorerwa amoko amwe muri RDC.

Urwanda rwamaganye ukuntu SADC yaje kurwanya imitwe ijujubya RDC yose ariko yo ikaba yarahisemo guhangana na M23 gusa ndetse yirengagiza amasezerano ya Nairobi na Luanda yo kwibanda ku biganiro bya politiki.