Perezida w’Amerika Joe Biden yageze ku masezerano na Misiri yo gutanga imfashanyo nkeya muri Gaza mu rwego rwo koroshya amakuba ashingiye ku mibereho mu gihe intambara hagati ya Israel na Hamas ikomeje.

Sponsored Ad

Ubwo yasuraga i Tel Aviv muri Israel, Biden yavuze ko Israel ifite uburenganzira bwo kwihorera ku gitero cya Hamas cyabaye imbarutso y’imirwano.

Perezida w’Amerika yavuze ko Israel "yahohotewe bikomeye", nubwo yaburiye ko yirinda "gutwarwa" n’umujinya.

Yanashyigikiye ibyo Israel yatangaje ko iturika ryabereye ku bitaro byo muri Gaza ku wa kabiri ritatewe n’igitero cy’indege cya Israel.

Abategetsi bo muri Palestine bavuga ko icyo cyaturikiye ku bitaro bya Al-Ahli Arab byo muri Gaza, cyishe abantu 471, abo bategetsi bacyegetse kuri Israel. Icyo giturika cyenyegeje kurushaho ubushyamirane mu karere.

Ariko mu ruzinduko i Tel Aviv ku wa gatatu rwamaze amasaha atageze ku munani, Biden yashyigikiye ibivugwa na Israel ko icyo giturika cyishe abantu, bisa nkaho cyatewe na rokete yarashwe nabi n’Abanya-Palestine.

Biden yavuze ko ababajwe cyane kandi ko arakajwe cyane n’icyo cyaturitse.

Israel ivuga ko icyo giturika cyatewe na Islamic Jihad, undi mutwe ukorera muri Gaza. Islamic Jihad irabihakana.

Umubare w’abishwe n’icyo giturika watangajwe na Palestine na wo wahakanwe na Israel. Lior Haiat, umuvugizi wa minisiteri y’ububanyi n’amahanga ya Israel, yatangaje ku rubuga nkoranyambaga X ko "abantu babarirwa muri za mirongo nyinshi" "uko bigaragara bishwe".

Ubwo yari asubiye muri Amerika, Biden yaganiriye kuri telefone na Perezida wa Misiri Abdel Fattah al-Sisi ku mfashanyo igenewe Gaza.

Biden yabwiye abanyamakuru ko Sisi yemeye gufungura inzira ya Rafah iva mu Misiri yerekeza muri Gaza, kugira ngo imodoka z’amakamyo zigera hafi kuri 20 zitwaye imfashanyo igenewe imbabare zishobore kuyigeza muri Gaza.

Misiri yemeje ko Perezida wayo na Biden bemeranyijwe gutanga imfashanyo kuri Gaza "mu buryo burambye".

Biden ntiyatanze ingengabihe ku ifungurwa ry’uwo mupaka, ariko John Kirby, umuvugizi w’ibiro bya Perezida w’Amerika (White House), yavuze ko ibyo bizaba mu minsi iri imbere nyuma yo gusana umuhanda.

Israel ntizatambamira imfashanyo – Netanyahu

Biden yanavuze ko inkunga ya miliyoni 100 z’amadolari y’Amerika izagenerwa gufasha abasivile b’Abanya-Palestine.

Umuntu ubizi yabwiye ibiro ntaramakuru Reuters ko Biden arimo gutekereza ku gusaba inteko ishingamategeko y’Amerika imfashanyo ya miliyari 10 z’amadolari igenewe Israel, bitarenze ku wa gatanu w’iki cyumweru.

Abantu bacyeneye cyane ibiribwa, amazi, ibitoro, imiti n’ibindi by’ingenzi mu buzima, nyuma yuko Israel ihagaritse ko byinjira muri Gaza kuva mu minsi 10 ishize.

Israel yihoreye nyuma yuko umutwe w’intagondwa wa Hamas w’Abanya-Palestine wishe abantu 1,400 mu gitero muri Israel kitari cyarigeze kibaho mbere, uvuye muri Gaza, ku itariki ya 7 y’uku kwezi kw’Ukwakira (10).

Abantu nibura 3,000 biciwe muri Gaza mu bitero byo kwihorera bya Israel, nkuko bivugwa n’abategetsi bo mu rwego rw’ubuzima muri Palestine. Abanya-Palestine barenga miliyoni imwe bataye ingo zabo bahungira imbere muri Gaza - abo ni hafi kimwe cya kabiri (1/2) cy’abaturage ba Gaza.

Minisitiri w’intebe wa Israel Benjamin Netanyahu yemeje ko Israel itazabuza ko imfashanyo ivuye mu Misiri igera ku baturage b’abasivile mu majyepfo ya Gaza.

Ariko Israel yavuze ko itazemera ko imfashanyo iyo ari yo yose inyuzwa ku butaka bwayo, kugeza ubwo abashimuswe na Hamas bazaba bamaze kurekurwa. Israel ivuga ko abantu bagera hafi kuri 200 bashimuswe.

BBC