Urukiko rwa gisirikare rwo mu mujyi wa Gulu mu majyaruguru ya Uganda rwakuyeho ibirego byo gutunga imbunda n’amasasu binyuranyije n’amategeko byaregwaga Depite Bobi Wine, umuhanzi wabaye umunyapolitiki ruramurekura hashize akanya gato ahita ajyanwa mu rukiko rwa gisivile.

Sponsored Ad

Ikinyamakuru The New Vision cya leta ya Uganda cyatangaje ibi nyuma y’ uko kuri uyu wa Kane aribwo Robert Kyangulanyi [Bob Wine] yitabye urukiko rwa gisirikare.

Nyuma y’ iminota mike arekuwe BBC yatangaje ko we n’ abandi banyapolitiki bane bafunganywe bahise bagezwa imbere y’ urukiko rwa gisivile.

Urukiko rwa gisivile rumukurikiranyeho ibyaha by’ubugambanyi rwategetse ko we n’abo bafunganye bakomeza gufungwa kugera ku itariki ya 30 y’uku kwezi kwa munani, runategeka ko bemererwa kuvurwa na muganga wigenga bihitiyemo.

Mbere yaho, umwunganizi we mu mategeko, Medard Segona, yari yabwiye urukiko rwa gisirikare ko nubwo yishimiye gukurirwaho ibirego n’urwo rukiko, adashaka ko umukiliya we ashyikirizwa polisi ngo ashinjwe ibindi birego.
Ikinyamakuru The New Vision cya leta ya Uganda cyatangaje ko mbere ubwo Bobi Wine yitabaga urukiko rwa gisirikare, yagaragaye "afite intege nkeya."

Hagati aho, polisi ya Uganda yagose urugo ruri mu murwa mukuru Kampala rwa Dogiteri Kizza Besigye, umunyapolitiki ukomeye utavuga rumwe n’ubutegetsi bw’iki gihugu, imuta muri yombi.
Uku gutabwa muri yombi kwatumye umwuka w’ubushyamirane urushaho kwiyongera muri Uganda. Wine, utavuga rumwe n’ubutegetsi bwa Uganda, amaze icyumweru kirenga afunze.

Gutabwa muri yombi kwe ndetse agafungwa hamwe n’abandi banyapolitiki bagenzi be, byateje umwuka mubi muri poliki y’iki gihugu mu gihe cy’icyumweru.

Ku wa mbere, imyigaragambyo yabereye mu murwa mukuru Kampala yaguyemo umuntu umwe naho abandi barenga 100 batabwa muri yombi.