Bamwe mu Banyafurika y’Epfo barahamagarira u Bwongereza gusubiza diyama nini ku Isi, izwi ku izina ry’Inyenyeri ya Afurika (Star of Africa), yashyizwe mu ikamba ry’ubwami Umwami Charles III agiye kwambikwa ku mugaragaro kuri uyu wa Gatandatu utaha .

Sponsored Ad

Diyama ipima karat 530, yavumbuwe muri Afurika y’Epfo mu 1905 maze ishyikirizwa Ubwami bw’u Bwongereza nyuma y’imyaka ibiri na guverinoma y’abakoloni muri icyo gihugu, icyo gihe cyategekwaga n’u Bwongereza.

Muri iki gihe rero ku Isi hakomeje ibiganiro bijyanye no gusubiza ibihangano byasahuwe mu gihe cy’abakoloni, bamwe mu Banyafurika y’Epfo barasaba ko iyo diyama igarurwa nk’uko iyi nkuru dukesha Al Jazeera ivuga.

“Diyama igomba kuza muri Afurika y’Epfo. Igomba kuba ikimenyetso cy’ishema ryacu, umurage wacu n’umuco wacu, ”ibi bikaba byavuzwe na Mothusi Kamanga, umunyamategeko akaba n’impirimbanyi y’i Johannesburg wateje imbere icyifuzo cyo kuri interineti cyakusanyije imikono igera ku 8000, kugira ngo diyama isubizwe.

Ati: "Ntekereza ko muri rusange abaturage ba Afurika batangiye kubona ko gukuraho ubukoloni atari ukureka gusa abantu bakagira ubwigenge runaka, ahubwo ni no kwisubiza ibyo twambuwe."

Iyi diyama izwi ubusanzwe nka Cullinan I iri mu ikamba ry’Umwami w’u Bwongereza, yakaswe kuri diyama ya Cullinan, ipima karat 3,100 yacukuwe hafi ya Pretoria.

Kopi ya diyama yose ya Cullinan, ingana n’ubunini bw’igipfunsi cy’umugabo, yerekanwa mu nzu ndangamurage ya diyama ya Cape Town Diamond.

Umuturage wa Johannesburg, Mohamed Abdullahi yagize ati: "Nizera ko igomba gusubizwa mu rugo kuko n’ubundi bayitwambuye igihe bari baradukandamije."