Urukiko rw’Ikirenga rwemeje ko Donald Trump yemerewe kwiyamamariza kuyobora Leta Zunze Ubumwe za Amerika mu matora ateganyijwe muri uyu mwaka.

Sponsored Ad

Ni icyemezo gikuraho inzitizi zari zagaragajwe kubera uruhare rwa Trump mu myigaragambyo yabereye ku Ngoro y’Inteko Ishinga Amategeko mu 2021.

Ku wa mbere, abacamanza bakuyeho icyemezo cyo ku ya 19 Ukuboza cy’urukiko rukuru rwa Colorado rwo kwirukana Trump mu biyamamaza hakurikijwe ingingo ya 14 y’Itegeko Nshinga rya Amerika, rikubiyemo igice kibuza abantu gukora imirimo ya Leta igihe bagize uruhare mu myigaragambyo.

Nubwo izo manza zari zihari,Trump akomeje ibikorwa byo gushaka uko yatsinda mu ishyaka rye ry’aba Repubulikani akazahatana n’umukandida w’Abademokarate Biden.

Trump ari gushaka cyane ku mugaragaro amajwi y’abirabura, amajwi yagize uruhare rudasanzwe mu ntsinzi ya Joe Biden mu matora ya 2020.

Abanenga Trump bamushinje gushishikariza no gushyigikira igitero cyagabwe ku ngoro y’inteko ishinga amategeko ya Amerika, Capitol, ku ya 6 Mutarama 2021, mu rwego rwo kwamagana amatora ya perezida ya 2020, Joe Biden yatsinzemo Trump.

Iki cyemezo cyatesheje agaciro ingufu zashyizweho muri Leta ya Colorado, Illinois, Maine n’ahandi kugira ngo birukane Trump mu matora kubera iriya myitwairire yo mu matora yo muri 2020.Ubu bishoboka ko azongera guhangana na Biden mu matora ya perezida yo mu Gushyingo uyu mwaka.