Mu Misiri, Komisiyo y’igihugu y’amatora yatangaje ko Perezida Abdel Fattah al-Sisi ari we watsindiye umwanya w’umukuru w’igihugu. Perezida al-Sisi yegukanye amajwi 89.6%. Bityo aba abonye manda ya gatatu y’imyaka itandatu.

Sponsored Ad

Abarenga miliyoni 39 batoye Sisi ngo ayobore iki gihugu gituwe kurusha ibindi byose by’abarabu.Aje guhangana n’ibibazo iki gihugu gifite birimo ihungabana ry’ubukungu,intambara ya Israheli na Hamas iri kubera ku muturanyi wabo Gaza,n’ibindi.

Uwamukurikiye yitwa Hazem Omar, wo mu ishyaka rya Republican People wagize amajwi 4.5 %.

Ababikurikiranira hafi basanga nta gitangaza kirimo kuko atari afite umukandida ukomeye muri batatu bari bahanganye nawe. Amaze imyaka 10 ku butegetsi.

Mu 2013, Abdel Fattah al-Sisi, wahoze ari Jenerali mukuru w’igisirikare, yahiritse ubutegetsi bwa perezida wa mbere wari watowe mu buryo bwa demokarasi, Mohamed Morsi.

Ku butegetsi bwe,yafunze abanyapolitiki ibihumbi abahora kutavuga rumwe nawe gusa abamwemera bamushimira ko yazanye ituze mu gihugu cyari cyononekaye ku bwa Hosni Mubarak, muri 2011.

Mu 2014, yatorewe manda ya mbere. Yongeye gutorwa mu 2018. Hombi n’amajwi 97%. Mu 2019, yahinduye itegeko nshinga, manda ye iva ku myaka ine ijya kuri itandatu. Ridahindutse na none, iyi yaba ari yo manda ye ya nyuma.

(AFP, Reuters)