Perezida w’Amerika Joe Biden yatangaje ko mu 2024 azongera kwiyamamaza, ibi bikaba biharuye inzira yuko ashobora kongera guhatana na Donald Trump.
Uyu wo mu ishyaka ry’abademokarate, hari hashize igihe yitezwe ko azahatanira manda ya kabiri y’imyaka ine, yatangaje kongera kwiyamamaza kwe mu butumwa bwa videwo ku wa kabiri.
Yavuze ko iki ari igihe cy’ingenzi cyane, aho ubwisanzure n’uburenganzira biri ku nkeke. Yagize ati: "Iki si igihe cyo kudamarara. Ni yo mpamvu ndimo kwiyamamaza".
Visi (...)

Sponsored Ad

Perezida w’Amerika Joe Biden yatangaje ko mu 2024 azongera kwiyamamaza, ibi bikaba biharuye inzira yuko ashobora kongera guhatana na Donald Trump.

Uyu wo mu ishyaka ry’abademokarate, hari hashize igihe yitezwe ko azahatanira manda ya kabiri y’imyaka ine, yatangaje kongera kwiyamamaza kwe mu butumwa bwa videwo ku wa kabiri.

Yavuze ko iki ari igihe cy’ingenzi cyane, aho ubwisanzure n’uburenganzira biri ku nkeke. Yagize ati: "Iki si igihe cyo kudamarara. Ni yo mpamvu ndimo kwiyamamaza".

Visi Perezida Kamala Harris, w’imyaka 58, ni we bazongera kwiyamamazanya ku mwanya wa Visi Perezida.

Biden, w’imyaka 80, asanzwe ari we Perezida ushaje cyane wabayeho mu mateka y’Amerika ndetse birashoboka ko mu kwiyamamaza kwe azabazwa ku myaka ye. Abaye atsinze amatora, yaba afite imyaka 86 ubwo yaba asoje manda ye ya kabiri – ari na yo ya nyuma muri Amerika – mu mwaka wa 2029.

Mbere yaho muri uyu mwaka yagize ati: "Byemewe n’amategeko kuba abantu babaza ibibazo ku myaka yanjye. Kandi ikintu cyonyine navuga ni, munyitegereze".

Ubwo hari hashize amasaha atangaje kandidatire ye, Perezida Biden yagejeje ijambo ku bakozi bo mu ishyirahamwe riharanira inyungu z’abakozi ari i Washington, DC aho yakiranywe ibyishimo, batera hejuru bati, "Twagiye, Joe", bongeraho bati, "indi myaka ine!".

Mu ijambo rye, Perezida Biden yashimangiye igisa nkaho ari intero izaranga ibikorwa bye byo kwiyamamaza mu 2024, ati: "Iki ni igihe cyo kurangiza akazi".

Yababwiye ku bikorwa bye byo kuzahura ubukungu bw’Amerika nyuma y’icyorezo cya coronavirus no ku mushinga w’itegeko uruhiriweho n’ishyaka ry’abademokarate n’iry’abarepubulikani wo guteza imbere ibikorwa-remezo, nuko, akomoza ku byo yakora muri manda ya kabiri, ati: "Turacyafite byinshi byo gukora".

Biden yahatanye na Trump mu matora yo mu 2020, ahigika uyu murepubulikani nyuma yo gusezeranya "gusubizaho roho [ishingiro] ya Leta Zunze Ubumwe [z’Amerika]".

Muri videwo y’iminota itatu yatangajemo kongera kwiyamamaza kwe, imugaragaza ahura n’Abanyamerika bo mu nzego zitandukanye, Biden yagize ati: "Ubwo niyamamarizaga kuba perezida mu myaka ine ishize, navuze ko turi mu rugamba rwa roho y’Amerika – kandi turacyarurimo".

Iyo videwo inarimo amashusho yo mu gitero cyo mu 2021 ku nyubako ikorerwamo n’inteko ishingamategeko y’Amerika, ubwo abashyigikiye Trump bayiraragamo (bayigabizaga) mu muhate wo kuburizamo gutsindwa kwe na Biden.

Trump asanzwe yaratangije ibikorwa byo kongera kwiyamamaza. Ibi bica amarenga ko aba bagabo bombi bashobora kongera guhatana mu matora yo ku itariki ya 5 Ugushyingo (11) mu 2024.

Bombi bahabwa amahirwe menshi yuko buri umwe azatoranywa n’ishyaka rye nk’umukandida waryo muri ayo matora, nubwo Trump ashobora guhatana na Guverineri Ron DeSantis wa leta ya Florida kuri uwo mwanya wo guhagararira abarepubulikani.

Mu itangazo yasohoye ku wa mbere nijoro, Trump yagize ati: "Ushobora gufata abaperezida batanu babi cyane [badashoboye] babayeho mu mateka y’Amerika, ukabashyira hamwe, kandi ibyo bangije ntibyagera ku kwangiza kwakozwe na Joe Biden".

Biden yari amaze igihe yumvikanisha ko ateganya kongera kwiyamamaza, ikibazo cy’ingenzi cyibazwaga ni igihe azabitangariza.

Nyuma yo kumara impera y’icyumweru ari kumwe n’abajyanama be i Camp David, aho ba perezida b’Amerika bakorera umwiherero ho muri leta ya Maryland, yahisemo gutangiza kongera kwiyamamaza kwe ku isabukuru y’imyaka ine ishize atangaje kwiyamamaza kwe kwo mu 2020.

Julie Chavez Rodriguez, umujyanama wo ku rwego rwo hejuru mu biro bya Perezida w’Amerika, White House, ni we uzaba uyoboye ibikorwa byo kwiyamamaza bya Biden.

Kugeza ubu Biden nta bo afite bahatanye bakomeye mu guhatanira guhagararira ishyaka ry’abademokarate, bivuze ko guhagararira iri shyaka kwe bisa nkaho byizewe.

Senateri Bernie Sanders wa leta ya Vermont, w’ingenzi wari uhatanye na Biden mu 2020 mu guhagararira ishyaka ry’abademokarate, ku wa kabiri yavuze ko atazahatana na Biden mu 2024.

Ahubwo yavuze ko ashyigikiye kongera kwiyamamaza kwa Biden.

Ariko amakusanyabitekerezo yo mu gihe cya vuba aha gishize yumvikanisha ko icyemezo cya Biden cyo kongera kwiyamamaza ari ingingo icamo ibice abo mu ishyaka rye ndetse no ku rwego rw’igihugu.

Ikusanyabitekerezo ryakozwe n’igitangazamakuru NBC News mu mpera y’icyumweru gishize ryasanze 70% by’Abanyamerika, ndetse n’abarenze kimwe cya kabiri (1/2) cy’abademokarate, bemeza ko Biden adakwiye kongera kwiyamamaza.

Benshi mu bavuze ko Biden adakwiye kongera kwiyamamaza babishingiye ku myaka ye, bavuga ko iteye impungenge. 48% bavuze ko imyaka ye iteje "impungenge ikomeye".

BBC