skol
Kigali
startimes

Perezida Ndayishimiye yarahiriye kuyobora u Burundi asimbuye Nkurunziza wabuyoboye imyaka 15

Amakuru   Yanditswe na: 18 June 2020 Yasuwe: 5923

Uyu munsi tariki ya 18 Kamena 2020 nibwo habaye umuhango w’irahira rya Perezida watowe, Évariste Ndayishimiye wasimbuye Nkurunziza uherutse gutabaruka kuwa 08 Kamena 2020.


Ibirori byo kurahira k’ umukuru w’igihugu mushya w’u Burundi, Evariste Ndayishimiye, byabereye ku kibuga cy’umupira w’amaguru cyitwa Ingoma cyo mu ntara ya Gitega, umurwa mukuru wa politike.

Ndayishimiye yarahiriye kuzubaha itegekonshinga ry’u Burundi,kurwanya ivanguramoko no guteza imbere igihugu muri rusange.

Yagize ati "Imbere y’Imana Mushoboravyose, imbere y’Abarundi bose bo bene igihugu, jewe Evariste Ndayishimiye Umukuru w’Igihugu c’Uburundi, ndarahiye ko ntazotirigana ku Masezerano y’Ubumwe bw’Abarundi, kw’Ibwirizwashingiro rya Repubulika y’Uburundi n’ayandi mabwirizwa kandi ndemeye ko nzoharanira ntiziganya ineza y’Uburundi n’Abarundi, nkubahiriza ubumwe bw’Abarundi, amahoro n’ubutungane kuri bose. Ndemeye kurwanya ivyiyumviro n’ingendo y’ihonyabwoko n’ugukumirana, guharanira no guteza imbere agateka ka zina muntu n’ak’abenegihugu bose, no kwubahiriza imbibe n’ukwikukira kwa Repubulika y’Uburundi.

Abarundi ibihumbi bari bambaye amashati y’ibitenge bitabiriye umuhango wo kurahira kwa Perezida Ndayishimiye watsinze amatora.

Mu gusengera perezida Evariste Ndayishimiye, Musenyeri Simon Ntamwana wa Diyoseze Gitega, yamusabye gukora ibishoboka byose kugira ngo acyure impunzi, yongere yugurure amarembo y’ububanyi n’amahanga.

Urukiko rushinzwe kurengera itegekonshinga rwakiriye indahiro ye aba perezida wa 10 w’u Burundi ugiye kuyobora imyaka 7 iri imbere.

Nubwo Ndayishimiye yagombaga kurahira muri Kanama 2020,Urukiko rushinzwe kurengera itegeko nshinga rwategetse ko irahira rye ryihutishwa kubera urupfu rwa Pierre Nkurunziza rwaje rutunguranye.

Uretse uwahoze ari Perezida wa Tanzania,Jakaya Mrisho Kikwete nta wundi mukuru w’igihugu witabiriye uyu muhango w’irahira rya perezida Ndayishimiye, kubera impamvu z’icyorezo cya Koronavirusi.

Abandi baza kwitabira uyu muhango barimo abaminisitiri b’Ububanyi n’amahanga b’ibihugu bitandukanye,intumwa za Leta zitandukanye, abadipolomate n’abahagarariye imiryango mpuzamahanga mu Burundi.

Amajwi y’ibyavuye mu matora y’Umukuru w’Igihugu mu Burundi yabaye ku wa 20 Gicurasi 2020,yerekanye ko Gen. Evariste Ndayishimiye wa CNDD-FDD yagize 68,72%; akurikirwa na Agathon Rwasa wa CNL wagize 24,19%.

Kuwa kane tariki ya 04/06/2020, Urukiko rushinzwe kurengera itegeko nshinga mu Burundi nibwo rwemeje ko ishyaka riri ku butegetsi mu Burundi CNDD-FDD rihagarariwe na Gen.Evariste Ndayishimiye ari ryo ryegukanye burundu intsinzi mu matora ya Perezida ,Abadepite n’abayobozi ba Komini yabaye ku wa 20 z’ukwezi kwa gatanu 2020.

Perezida Evariste Ndayishimiye ni muntu ki?

Evariste Ndayishimiye yari asanzwe ari umunyamabanga mukuru w’ishyaka riri ku butegetsi rya CNDD-FDD, umwanya ariho guhera mu kwezi kwa munani mu mwaka wa 2016.

Afatwa nka soma mbike wa Perezida ucyuye igihe Pierre Nkurunziza.

Bwana Ndayishimiye w’imyaka 52 y’amavuko, yavukiye muri komine Giheta mu ntara ya Gitega iri rwagati mu Burundi. Ni nayo irimo usigaye ari umurwa mukuru w’igihugu ari wo Gitega.

Azwi nk’umwe mu bari abasirikare bakomeye ubwo ishyaka CNDD-FDD ryari rikiri umutwe w’inyeshyamba, mu ntambara yadutse mu Burundi nyuma y’iyicwa rya Perezida Melchior Ndadaye wabaye perezida wa mbere wari utowe mu buryo bwa demokarasi mu kwezi kwa cumi mu 1993, amaze amezi atatu ku butegetsi.

Bwana Ndayishimiye ari mu barokotse ubwicanyi bwakorewe abanyeshuri b’Abahutu kuri Kaminuza y’u Burundi mu kwezi kwa gatandatu mu 1995, bituma asanga abandi barwanyi b’uwo mutwe w’inyeshyamba, icyo gihe witwaga CNDD, ishami ryawo rya gisirikare rikitwa FDD.

Uwo mutwe wari uyobowe na Léonard Nyangoma wawushinze mu 1994.

Nyuma yaho uwo mutwe wiswe CNDD-FDD umaze kwinjira mu masezerano y’amahoro y’i Arusha muri Tanzania mu mwaka wa 2000, Jenerali Majoro Ndayishimiye yakoze mu biro bikuru bya gisirikare.

Nyuma yaje kugirwa Minisitiri w’ubutegetsi bw’igihugu kuva mu 2006 kugera mu 2007, mbere yuko agirwa umunjyanama mu bya gisirikare mu biro bya perezida.

Yashakanye na Angélique Ndayubaha, ubu bakaba bafitanye abana umunani.

Mu kwiyamamaza kwe, Bwana Ndayishimiye yashyize imbere gahunda zirimo ibijyanye no gukomeza inzego z’umutekano n’ubwirinzi, gukomeza urwego rw’ubucamanza, imiyoborere myiza, imibereho y’abaturage, ibijyanye n’urwego rw’ubuzima, kurwanya ibura ry’akazi (ubushomeri/chômage), guteza imbere ibijyanye no kubungabunga ibidukikije, umuco n’imikino.

Mu kwiyamamaza kwe kandi yagarutse kuri gahunda z’ubukungu bushingiye ku buhinzi n’ubworozi, umutungo kamere, ubucuruzi, gutwara abantu n’ibintu, n’ibijyanye n’inganda.

Evariste Ndayishimiye yasezeranyije gukomeza umubano n’amahanga ndetse n’umubano hagati y’u Burundi n’imiryango itandukanye.

Bwana Ndayishimiye w’imyaka 52, agiye kuyobora igihugu gifite ibibazo mu bukungu kandi kidafitanye umubano mwiza n’abagiraneza.

Uwo asimbuye ku butegetsi Nkurunziza,yashinjwe kubangamira uburenganzira bw’ikiremwamuntu, gutoteza abatavuga rumwe nawe, ibinyamakuru byigenga n’abaharanira uburenganzira bwa muntu.

Agiye kuyobora igihugu gihanganye na coronavirus nubwo perezida Nkurunziza we atashyize imbaraga mu ngamba zo kucyirinda

Azashyiraho leta izaba iyobowe na minisitiri w’intebe, nk’uko itegekonshinga rishya ribitegeka





AMAFOTO: Ntare Rushatsi

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Perezida Trump yateranye amagambo na perezida Xi Jinping mu nama ya...

Ubushyamirane hagati y’Amerika n’Ubushinwa bwigaragaje mu nama rusange...
23 September 2020 Yasuwe: 1344 0

Amerika yahakanye ibyo gushinga ibirindiro bya gisirikare mu...

Nk’uko byakomeje guhwihwiswa ku mbuga nkoranyambaga mu mpera z’icyumweru...
22 September 2020 Yasuwe: 5391 0

DR Congo: Perezida Tshisekedi yagiranye ibiganiro na Kabila yasimbuye ku...

Perezida wa Repubulika Iharanira demokarasi ya Congo Félix Tshisekedi...
22 September 2020 Yasuwe: 1466 0

Burundi:Brig. Gen. Athanase Kararuza yiciwe hamwe n’umuryango we,abafite...

Brig. Gen. Athanase Kararuza wari umujyanama wa Visi Perezida wa Repubulika...
22 September 2020 Yasuwe: 8743 0

UN irizihiza imyaka 75 imaze ishinzwe -N’iki gikomeye yagezeho...

Umuryango w’abibumbye ku isi, ONU cyangwa UN, ibihugu biwugize uyu munsi...
21 September 2020 Yasuwe: 338 0

Joseph Kabila ari mu nzira yo gusubirana ubutegetsi – Minisitiri Claude...

Minisitiri w’Ibidukikije n’Iterambere rirambye muri Repubulika Iharanira...
19 September 2020 Yasuwe: 3258 1