Perezida w’u Burundi, Evariste Ndayishimiye, uwa Malawi, Lazarus Chakwera ni bamwe mu bakuru b’ibihugu bateganya kwitabira umuhango w’irahira rya Perezida Felix Tshisekedi wa Repubulika ya Demokarasi ya Congo kuri uyu wa Gatandatu, itariki 20 Mutarama 2024 kuri stade des Martyrs.

Sponsored Ad

Byibuze abakuru b’ibihugu 18, ba visi perezida babiri na bane bahoze ari abakuru b’ibihugu bategerejwe i Kinshasa nk’uko byemejwe mu ijoro ryo kuri uyu wa Kane ushize n’intumwa nkuru y’umukuru w’igihugu akaba ari nawe ushinzwe gutegura uyu muhango, Serge Tshibangu.

Itangazo rigenewe abanyamakuru ryashyizwe ahagaragara na minisiteri y’ububanyi n’amahanga ya Malawi, rivuga ko Perezida Dr Lazarus McCarthy Chakwera agomba kuba ari muri Repubulika ya Demokarasi ya Congo kuva kuri uyu wa 19 kugeza kuwa 21 Mutarama 2024.

Iri tangazo rivuga kandi ko Perezida Chakwera azanagirana ibiganiro na Tshisekedi ku bibazo by’umutekano mu karere, aho Igisirikare cya Malawi cyanohereje ingabo mu butumwa bwo kubungabunga amahoro.

Perezida w’u Burundi, Evariste Ndayishimiye, kuri uyu wa Kane ushize werekeje muri Uganda mu nama y’Abakuru b’Ibihugu na za Guverinoma bihuriye mu Muryango w’ibihugu bidafite aho bibogamiye (Non-Aligned Movement) na we yamaze kwemeza ko azitabira uyu muhango w’irahira rya Tshisekedi i Kinshasa.