Perezida Samia Suluhu Hassan wa Tanzania yemereye igisirikare ko leta ye igiye “kwiga ikibazo cy’impunzi cyane cyane z’Abarundi n’iza Repubulika ya Demokarasi ya Congo” no kureba uburyo zisubizwa iwabo.

Sponsored Ad

Mu birori byo gufungura inama ya karindwi y’abayoboye igisirikare cy’iki gihugu byabaye ku wa kabiri i Dar es Salaam, umukuru w’igisirikare yabwiye Perezida Samia Suluhu ko “ikibazo nyamukuru kibangamiye umutekano mu ntara zo mu burengerazuba bwa Tanzania ari uko ako karere kahaye icumbi impunzi n’abasaba ubuhungiro igihe kirekire”.

Ati: “Ku makuru ahari, ni uko benshi muri izo mpunzi cyangwa abashaka ubuhungiro, cyane imiryango yabo, bahawe akazi muri leta, mu nzego zitandukanye,ndetse hari n’abari mu nzego zifata ibyemezo”.

Mu ijambo rye, Jenerali Jacob John Mkunda uyoboye igisirikare cya Tanzania yibukije ko Tanzania imaze imyaka itari mike yakira impunzi ziva mu Burundi, muri Congo, no mu Rwanda, kuva mu 1972, aho yavuze ko no mu mwaka ushize abarenga 139.000 binjiye muri Tanzania.

Avuga ko abenshi mu bahunze mu mwaka ushize, bahunze ku mpamvu z’ubukene kuko “Tanzania ifite amahirwe menshi mu bijyanye n’ubukungu gusumbya ibihugu baje bavamo”.

Yasabye leta ko yakwiga uburyo yasubiza iwabo impunzi ziva mu bihugu umutekano wagarutse.

Jenerali Mkunda asaba kandi leta “kwirukana impunzi zatswe uburenganzira bwo kwitwa impunzi, abimukira badafite ibyangombwa hamwe n’abasaba ubuhungiro babubuze”.

Perezida Samia Suluhu yemereye izi ngabo ko agiye gufatana uburemere iki kibazo kubera ishyirahamwe rishinzwe impunzi ku isi ryagabanyije inkunga mu gikorwa cyo gucyura izi mpunzi.

Ati: “Ukuri ni uko iri shyirahamwe ubu nta ngufu rigifite, na wa muvuduko wo gucyura impunzi bari bafite waragabanutse”.

Avuga ko bazakomeza ibiganiro bya politike hagati ya Tanzania n’ibihugu baturanye kugira ngo bige inzira ikwiye yo gutahukana izi mpunzi.

Ati: “Iki kibazo turagifashe kandi tugiye kugihagurukira”.

Imibare itangwa n’ishyirahamwe rishinzwe impunzi ku isi yerekana ko kugeza muri Kamena 2023, Tanzania yari yahaye icumbi impunzi n’abasaba ubuhungiro barenga 255.000, benshi bava mu Burundi, no muri DR Congo.

Impunzi z’Abarundi ziba mu kambi ya Kasulu na Kibondo mu ntara ya Kigoma zifite ubwoba ko leta ya Tanzania ishobora kuzirukana nk’uko byagenze mu 2012, ariko ikavuga ko nta mugambi nk’uwo ifite, ko ahubwo izakomeza kubashishikariza guhunguka ku bushake bwabo.

BBC