skol
Kigali
startimes

Ubushinwa, Uburusiya na Iran ’biri kugerageza kugena ibizava mu matora’ yo muri Amerika

Amakuru   Yanditswe na: Dusingizimana Remy 8 August 2020 Yasuwe: 1908

Umwe mu bakuriye ubutasi bwa Leta Zunze Ubumwe z’Amerika yaburiye ko Ubushinwa, Uburusiya na Iran ari bimwe mu bihugu bishaka kugena ibizava mu matora ya perezida w’Amerika y’uyu mwaka.


Itangazo ryasohowe n’ukuriye urwego rw’Amerika rwo kuburizamo ubutasi bw’amahanga (counterintelligence/contre-espionage) rivuga ko ibihugu by’amahanga birimo kwifashisha "ingamba zihishe n’izigaragarira ijisho" zo kugena ko abatora batora uwo ibyo bihugu bishaka.

William Evanina, ukuriye urwo rwego, yavuze ko Ubushinwa budashaka ko Perezida Donald Trump yongera gutorwa kuri manda ya kabiri - ya nyuma yemewe muri Amerika.

Naho Uburusiya bwo bukaba bushaka gukoma mu nkokora umukandida Joe Biden wo mu ishyaka ry’abademokarate.

Abakuru b’inzego z’ubutasi bashinja Uburusiya kwivanga mu matora ya perezida yo muri Amerika yo mu mwaka wa 2016.

Bavuga ko Uburusiya bwashatse gufasha mu kongerera imbaraga ibikorwa byo kwamamaza Bwana Trump, harimo no gukwiza ku mbuga za internet amakuru ayobya. Uburusiya bwahakanye ibyo birego.

Mu kiganiro n’abanyamakuru cy’ejo ku wa gatanu, Perezida Trump yabajijwe ku cyo ateganya gukora kuri iyo raporo ivuga ku kwivanga kw’ibihugu bimwe by’amahanga mu matora yimirije.

Yasubije ko ubutegetsi bwe "buzabikurikiranira hafi cyane".

Bwana Trump yavuze ko "bishoboka" ko haba hari ugushaka kwivanga mu matora yo muri uyu mwaka, ariko ahakana ko Uburusiya bwaba buri kugerageza kumufasha gutsindira manda ya kabiri.

Ati: "Ntekereza ko umuntu wa nyuma [na nyuma] Uburusiya bushaka kubona ku butegetsi ari Donald Trump", yongeraho ati: "Nta muntu n’umwe wigeze ukarira Uburusiya kundusha, nta na rimwe".

Yanavuze ko Ubushinwa "bwashimishwa" nuko atsinzwe amatora, avuga ko "bakwigarurira [baba batunze] igihugu cyacu" Joe Biden atsinze.

Ibi bivugwa n’inzego z’ubutasi bije mu gihe hari ibivugwa na Bwana Trump byuko uburyo bwo kwifashisha iposita mu matora buteje ibibazo.

Yatanze igitekerezo cyuko amatora yakwigizwa inyuma mu kwirinda ko habaho "amatora arimo imibare itari iy’ukuri kandi arimo uburiganya ya mbere mu mateka" y’iki gihugu. Yahise yamaganwa n’abantu batandukanye, barimo n’abakuru bo mu ishyaka rye ry’abarepubulikani.

Muri iryo tangazo, Bwana Evanina avuga ko Iran yo iri kugerageza "gukoma mu nkokora inzego za demokarasi z’Amerika", Bwana Trump ndetse no "gucamo ibice" abaturage b’Amerika mbere y’amatora.

Avuga ko ibyo Iran ibikora ikwirakwiza kuri internet amakuru ayobya n’arwanya Amerika.

Yongeyeho ko ku ruhande rumwe, leta ya Iran ibikora kuko yemeza ko kongera gutorwa kwa Trump "byateza komeza igitutu kw’Amerika kuri Iran mu bikorwa bigamije ko ubutegetsi buhinduka".

Uru rwego rw’ubutasi bw’Amerika rutangaje ibi nyuma yuko abadepite bo mu ishyaka ry’abademokarate binubiye ko inzego z’ubutasi zitari guha rubanda amakuru ajyanye no kwivanga kw’amahanga mu matora ya perezida ateganyijwe kuba ku itariki ya gatatu y’ukwa 11.

Bwana Trump, wo mu ishyaka ry’abarepubulikani, ari gushaka kongera gutorwa ku yindi manda. Ahatanye na Joe Biden w’umudemokarate, wigeze kuba Visi Perezida w’Amerika.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Bobi Wine yahagaritse kwiyamamaza kubera akaga yahuye nako

Umukandida ku mwanya w’umukuru w’igihugu muri Uganda, Robert Kyagulanyi, uzwi...
2 December 2020 Yasuwe: 1610 0

Uzwiho kuba ari inshuti ya Trump yemeje ko nta buriganya bwabaye mu matora...

Umucamanza mukuru w’Amerika William Barr avuga ko ibiro by’ubutabera akuriye...
2 December 2020 Yasuwe: 736 0

Uganda: Bamwe mu bacunga Bobi Wine bakomerekeye mu mvururu zatewe na...

Abantu batari bake bakomerekeye mu karere ka Kayunga, hafi y’umurwa mukuru...
1 December 2020 Yasuwe: 1022 0

Iran yemeje ko umuhanga wayo mu gukora ibitwaro bya Nikleyeri ’yishwe...

Iran yemeza ko Israel ndetse n’umutwe utavuga rumwe na leta ukorera mu...
1 December 2020 Yasuwe: 3464 0

Ambasaderi wa Uganda muri Kenya ’Phibby Otaala’ yanze ko bamusimbura

Ambasaderi wa Uganda muri Kenya, Phibby Otaala, yatangaje ko...
30 November 2020 Yasuwe: 1476 0

Burundi: Umunsi Nkurunziza yatabarukiyeho wagizwe umunsi mukuru mu...

Leta y’u Burundi yatangaje ko tariki ya 08 Kamena nyakwigendera Pierre...
28 November 2020 Yasuwe: 1956 0