skol
startimes

Umuryango wa Paul Rusesabagina watanze ikirego mu rukiko rw’Africa y’Iburasirazuba

Amakuru   Yanditswe na: Dusingizimana Remy 28 October 2020 Yasuwe: 1709

Umuryango wa Paul Rusesabagina uvuga ko abanyamategeko washyizeho ejo ku wa kabiri batanze ikirego mu rukiko rw’Umuryango wa Africa y’Iburasirazuba kivuga ko "yafashwe binyuranyije n’amategeko, yashimuswe kandi yimwe uburenganzira ku rubanza rutabogamye."


Mu cyumweru gishize, urukiko mu mujyi wa Kigali rwongereye indi minsi 30 ku gifungo cy’agateganyo cyakatiwe Bwana Rusesabagina uregwa ibyaha 13 birimo iterabwoba.

Uko Rusesabagina yatawe muri yombi akagezwa mu Rwanda ntibivugwaho rumwe n’abagize umuryango we, amakuru y’uko yafashwe akagezwa mu Rwanda ntaratangazwa na we cyangwa leta mu buryo burambuye.

Uruhande rw’umuryango we ruvuga ko rwasabye urukiko rw’umuryango wa Africa y’iburasirazuba (EACJ) "gutegeka abategetsi b’u Rwanda kumurekura ako kanya" no "guhagarika burundu kumukurikirana mu Rwanda".

Uru rukiko rwashinzwe mu 1999 rushobora kugezwaho ibirego n’abantu bo muri aka karere, rukunze kuregerwa imanza zaciwe imbere mu bihugu bigize umuryango wa Africa y’Iburasirazuba.

Ntibizwi neza niba uru rukiko rukorera i Arusha ruzaburanisha uru rubanza, mu gihe rutararangira mu Rwanda.

Rusesabagina yamenyekanye ku isi kubera filimi "Hotel Rwanda" ishingiye ku nkuru - itavugwaho rumwe - y’uko yarokoye abantu muri Hôtel des Mille Collines i Kigali mu gihe cya Jenoside ariko bamwe mu bari bayirimo barabihakanye bivuye inyuma ahubwo bamushinja kubacuza nibyo bari bafite.

Mu itangazo ryasohowe n’abo ku ruhande rwe, umwe mu banyamategeko be Philippe Larochelle avuga ko uburyo u Rwanda rwafashe Rusesabagina "binyuranyije n’amahame y’uburenganzira bwa muntu rwemeye kubahiriza rwinjira muri uwo muryango w’ibihugu."

Ati: "Umuryango wa EAC uriho kugira ngo ibihugu biwugize ntibyemererwe gukora ibyo, urukiko rwa EACJ rutanga umwanya wo kugira ngo u Rwanda rube rwabazwa ibyo".

Ubwo yerekanwaga nyuma yo gufatwa, abayobozi mu Rwanda bavuze ko Bwana Rusesabagina "yafashwe ku bufatanye n’amahanga".

Mu kwezi gushize, Perezida Paul Kagame yabwiye televiziyo y’u Rwanda ko urebye Rusesabagina ari "we wanizanye."

Yagize ati: "…Kuko kuva aho yavuye kurinda agera hano, nta cyaha cyigeze gikorwa hagati aho ngaho na kimwe".

Aregwa ibyaha bishingiye ku bitero by’umutwe wa FLN ku Rwanda mu 2018 na 2019, byiciwemo abantu mu turere twa Nyaruguru na Nyamagabe, ahegereye ishyamba rya Nyungwe.

Umutwe wa FLN ni ishami rya gisirikare ry’impuzamashyaka MRCD-Ubumwe, Bwana Rusesabagina abereye umukuru wungirije.

Rusesabagina ubu afungiye muri gereza ya Kigali i Mageragere aho ategereje urubanza mu mizi.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Bobi Wine yarekuwe by’agateganyo ariko ashobora gufungwa imyaka...

Urukiko rwo mu burasirazuba bwa Uganda rwareze umukandida-perezida Robert...
20 November 2020 Yasuwe: 2910 0

Leta ya Tanzania yajyanwe mu rukiko kubera kubuza kwiga abanyeshuri...

Umuryango Equality Now uharanira uburenganzira bw’abagore, wareze leta ya...
20 November 2020 Yasuwe: 441 0

Uko iburanisha rya mbere rya Kabuga Felicien i La Haye ryagenze

Umwanya munini wafashwe n’umwanditsi w’urukiko asoma ibiregwa Felicien...
11 November 2020 Yasuwe: 2748 0

Felicien Kabuga yaburaniye mu rukiko rw’I La Haye ku nshuro ya...

Ku nshuro ya mbere, Kabuga Félicien ukurikiranweho ibyaha bya jenoside...
11 November 2020 Yasuwe: 1512 0

Umuryango wa Paul Rusesabagina watanze ikirego mu rukiko rw’Africa...

Umuryango wa Paul Rusesabagina uvuga ko abanyamategeko washyizeho ejo ku wa...
28 October 2020 Yasuwe: 1709 0

"Kujya mu Burundi kuburana ninko kwiyahura" –Pierre Buyoya

Pierre Buyoya wahoze ayoboye igihugu cy’U Burundi uherutse gukatirwa...
25 October 2020 Yasuwe: 2642 0