Abagenzuzi bo mu Bwongereza (UK) hamwe n’ishyirahamwe ry’Ubumwe bw’u Burayi (EU) basanze nta kimenyetso na kimwe cyerekana ko urukingo rwa Covid, AstraZeneca, rutera kuvura kw’amaraso (coagulation du sang) nyuma "y’igenzura ryitondewe cyane".

Sponsored Ad

Ikigo MHRA gikora ubugenzuzi bw’imiti mu Bwongereza na EMA ikora ubugenzuzi muri EU byavuze ko abantu bashobora kugirira icyizere inyungu z’uru rukingo kandi ko bakwiye kwikingiza, nubwo hari ibihugu byahagaritse urukingo rwa AstraZeneca.

Ariko uwo ariwe wese urwaye umutwe ukamara iminsi ine nyuma yo guhabwa urukingo ngo akwiye guhita ajya kwa muganga, nk’uburyo bwo kwitabara.

Ibyo ni kubera ko abagenzuzi babonye amakuru atari menshi ko haba ukuvura kw’amaraso mu Bwonko.

Ubu bwoko bwo kuvura kw’amaraso kwatumye ibihugu bimwe byo muri EU bihagarika itangwa ry’urukingo rwa Oxford-AstraZeneca.

Mu Bwongereza, abantu batanu nibo bafashwe n’ukuvura kw’amaraso kuzwi nka cerebral sinus vein thrombosis (CSVT).Mu bantu miriyoni 11 batewe urwo rukingo, barimo abagabo bafite imyaka iri hagati ya 19 na 59. Umwe gusa niwe wahasize ubuzima.

Ikigo EMA cyamenye amakuru y’abandi bantu 13 barwaye CSVT.

CSVT ishobora kugera ku muntu nta sano n’urukingo ryigeze rigaragara. Abo bantu kandi bari bafite uturemangingo tw’amaraso (tuzwi nka blood platelet) duke - utwo turemangingo nitwo tugira uruhare mu gutuma haba kuvura kw’amaraso.

Imyanzuro y’igenzura rya EMA yasohotse kuri uyu wa Kane, ivuga ko “nta kimenyetso kigaragaza ko urukingo rwa AstraZeneca ari intandaro y’ikibazo cyo kuvura kw’amaraso cyagaragaye muri bamwe mu bantu bahawe urwo rukingo”.

Iki kigo cyanavuze ko “ibyiza byo kwiteza urukingo biruta kure ingaruka zo kutabikora”, gisaba ibihugu by’i Burayi byazihagaritse kongera kuzitanga.

Umuyobozi wa EMA, Emer Cooke, yavuze ko bazakomeza gukora amagenzura, ariko avuga ko urukingo rwa AstraZeneca rwagaragaje ubushobozi bwo kurinda Covid-19 kurusha uko abahanga babitekerezaga mu magerageza.

Ibihugu birimo u Bufaransa, u Budage, u Butaliyani, Espagne, Bulgarie, Portugal n’u Buholandi byamaze kwemeza ko biza gusubukura itangwa ry’urukingo rwa AstraZeneca nyuma ya raporo ya EMA.