Perezida wa Tanzania, John Pombe Magufuli ashobora kuba arwariye #COVID19 mu bitaro biri mu murwa mukuru wa Nairobi nkuko ibitangazamakuru byo Kenya bitangaje aya makuru.

Sponsored Ad

Ikinyamakuru cyo muri Kenya The Nation cyatangaje ko hari umuperezida wo muri Afurika y’Iburasirazuba urwariye muri Kenya gusa nticyavuze uwo ariwe muri iyo nkuru.

Ibi byahuhuwe n’ibyatangajwe n’utavuga rumwe n’ubutegetsi bwa Tanzania, Tundu Lissu yandikaga kuri Twitter yibaza aho Magufuli aherereye.

Tundu Antiphas Lissu kuri Twitter yanditse ati “Ni inkuru ibabaje ku muntu ushinzwe igihugu cyacu, kuba bivugwa ko we ubwe yanduye COVID-19 akajyanwa muri Kenya, biragaragaza ko amasengesho, kwiyuka ibyatsi, n’imiti gakondo itizewe yashishikarizaga abantu gukoresha itagize icyo imaze kuri Coronavirus!.

Ubuzima bwa Perezida ni ikintu gikomeye ku baturage. Twaramenyeshejwe ubwo Kikwete yajyaga kubagwa. Twaramenyeshejwe ubwo Mkapa yajyaga kubagwa igufwa ry’itako. Ntabwo twahejejwe mu rungabangabo ubwo Mwalimu yarwaraga leukemia. Magufuli arwaye iki tudakwiriye kumenya?."

Iki kinyamakuru cyavuze ko bamwe mu batavuga rumwe n’ubutegetsi bw’uyu mukuru w’igihugu umaze ibyumweru 2 atagaragara bavuze ko uyu muperezida ari ku mashini zimwongerera umwuka.

Icyakora cyanze gutangaza amazina y’uwo mukuru w’igihugu kuko haba Kenya arwariyemo n’igihugu cye banze kwemeza amakuru y’ubwo burwayi. Cyavuze ko aturuka mu gihugu kimaze igihe kitubahiriza amabwiriza yo kwirinda Covid-19.

Aya makuru aje ashimangira amaze igihe avugwa muri Tanzania ko abayobozi bakuru mu nzego zitandukanye bari guhitanwa na Covid-19 nubwo hari abo Leta yanze kuvuga icyabishe.

Perezida Magufuli yagiye agaragaza ko nta Coronavirus ibaho ndetse yasabye abantu kutambara udupfukamunwa ahubwo bagasenga Imana gusa.Tanzania ntiyigeze ifata ingamba zo kwirinda iki cyorezo.