Abantu 4 bitabye Imana abandi batatu barakomereka mu mpanuka ikomeye y’imodoka yabereye ahitwa mu Rukeco muri komine Busiga intara ya Ngozi kuri uyu wagatanu mu gitondo.

Sponsored Ad

Ababonye iyo mpanuka bemeza ko imvura yarimo kugwa hanyuma zi modoka 2 zari zifite umuvuduko mwinshi zirasekurana bituma abantu 4 bahita bahasiga ubuzima hanyuma abndi batatu barakomereka.

Ibi bibaye nyuma y’aho,tariki ya 29 Werurwe 2020, nabwo mu Burundi habaye mpanuka ikomeye y’ikamyo yacitse feri mu gace ka Kamenge ihitana abantu batandatu, barimo n’umugore wari utwite wahise ubagwa umwana yari atwite avanwa mu nda ye ari muzima.

Minisiteri y’umutekano mu Burundi icyo gihe yavuze ko iyi mpanuka yatewe n’uko iyi modoka yagize ikibazo cya feri.

Iyi mpanuka yabereye mu nzira yinjira mu mujyi wa Bujumbura utangiye ’quartier’ ya Kamenge na Gihosha muri komine Ntahangwa.

Icyo gihe Minisiteri y’umutekano mu Burundi yavuze ko hapfuye abantu batandatu hagakomereka batanu naho imodoka icumi zindi zikangirika gusa ababonye iyo mpanuka bavuze ko hapfuye abantu benshi kuko ngo iyi kamyo yagonze izindi modoka zirimo abantu.

Ibi bibaye mu gihe u Burundi na Tanzania banze gufata ingamba zikarishye mu rwego rwo kwirinda ikwirakwira rya Coronavirus,aho bo bakomeje ubuzima busanzwe imbere mu gihugu aho ibikorwa bihuza abantu bikomeje nk’ibisanzwe.

Imiryango mpuzamahanga yita ku buzima itewe impungenge n’uburyo u Burundi butafashe ingamba zo kwirinda ikwirakwira rya Coronavirus aho imbere mu gihugu ubuzima busanzwe bukomeje.

Ejo ku cyumweru habonetse amafoto y’abantu bakoraniye mu nsengero ari benshi bizihiza umunsi wa Pasika nta kibazo bafite.

Mu cyumweru gishize,Minisiteri y’ubuzima mu Burundi yatangaje ko mu bantu 2,936 bari barashyizwe mu kato bakekwaho coronavirus muri bo 2,261 barekuwe ngo bajye mu ngo zabo nyuma y’ibyumweru bibiri.

Minisiteri y’ubuzima ivuga ko aba bari barashyizwe mu kato mu bice bitandukanye by’igihugu, harimo abavuye mu bindi bihugu nk’uko amategeko yashyizweho ubu abitegeka.

Iyi minisiteri ntiyasobanuye niba aba bavuye mu kato bose barapimwe Covid-19, gusa ivuga ko nta bimenyetso by’iki cyorezo bagaragaje muri iki gihe bamaze mu kato.

Bamwe mu bashyizwe mu kato muri Hoteli batangaje ko bafunzwe bakavanywemo kuko bananiwe kwishyura amafaranga y’aho bari barashyizwe.

Minisiteri y’ubuzima yahakanye amakuru avugwa ku mbuga nkoranyambaga ko mu Burundi hageze ’urukingo’ rw’iki cyorezo rugiye kugeragezwa ruvuye mu Bushinwa.

Ikavuga ko "u Burundi butazigera bwemera kuba ahantu ho kugeragereza urukingo n’iyo rwaba urwa Covid-19".

Kuva kuwa 11 Mata 2020 kugeza ubu, minisiteri y’ubuzima mu Burundi itangaza ko umubare w’abanduye Coronavirus mu Burundi ari abantu batanu(5) gusa barimo umwe yahitanye.