Umuvugizi wa Minisiteri y’ubuzima mu Burundi [MSPLS] yatangaje ko kuri iki cyumweru tariki ya 12 Mata 2020,umuntu wa mbere yahitanwe na Coronavirus gusa ngo yari asanzwe afite indwara zikomeye.

Sponsored Ad

Umuvugizi w’iyi minisiteri ya MSPLS,abinyujije kuri Twitter yayo yavuze ko uyu muntu wahitanwe na Coronavirus yari ari kuvurirwa mu cyumba cy’indembe mu bitaro bya Kira biri mu mujyi wa Bujumbura ariko ubu burwayi bwamuhitanye nyum yo guhurirana n’izindi ndwara zikaze yari arwaye.

Ku mugoroba wo kuwa kabiri tariki 31 Werurwe 2020,nibwo Minisitiri w’Ubuzima mu Burundi, Dr Thaddée Ndikumana, yatangaje ko muri icyo gihugu ku nshuro ya mbere habonetse abantu babiri barwaye Coronavirus.

Minisitiri Ndikumana yasobanuye ko abagaragayeho icyo cyorezo ari abagabo babiri b’Abarundi b’imyaka 56 na 42 y’amavuko, bakaba ngo barinjiye mu Burundi baturutse mu bihugu byo hanze.

Hari hashize iminsi mu Burundi bivugwa ko hashobora kuba hari abanduye Coronavirus, ariko bamwe bakavuga ko icyo gihugu cyahishe amakuru kikanga kubishyira ku mugaragaro.

Ku mugoroba wo kuwa 6 Tariki ya 11 Mata 2020 nabwo, minisiteri y’ubuzima mu Burundi yatangaje ko habonetse abantu babiri bashya banduye Covid-19, umubare w’abayanduye ubu ni batanu(5).

Imiryango mpuzamahanga yita ku buzima itewe impungenge n’uburyo u Burundi butafashe ingamba zo kwirinda ikwirakwira rya Coronavirus aho imbere mu gihugu ubuzima busanzwe bukomeje.

Ejo ku cyumweru habonetse amafoto y’abantu bakoraniye mu nsengero ari benshi bizihiza umunsi wa Pasika nta kibazo bafite.

Mu cyumweru gishize,Minisiteri y’ubuzima mu Burundi yatangaje ko mu bantu 2,936 bari barashyizwe mu kato bakekwaho coronavirus muri bo 2,261 barekuwe ngo bajye mu ngo zabo nyuma y’ibyumweru bibiri.

Minisiteri y’ubuzima ivuga ko aba bari barashyizwe mu kato mu bice bitandukanye by’igihugu, harimo abavuye mu bindi bihugu nk’uko amategeko yashyizweho ubu abitegeka.

Iyi minisiteri ntiyasobanuye niba aba bavuye mu kato bose barapimwe Covid-19, gusa ivuga ko nta bimenyetso by’iki cyorezo bagaragaje muri iki gihe bamaze mu kato.

Bamwe mu bashyizwe mu kato muri Hoteli batangaje ko bafunzwe bakavanywemo kuko bananiwe kwishyura amafaranga y’aho bari barashyizwe.

Minisiteri y’ubuzima yahakanye amakuru avugwa ku mbuga nkoranyambaga ko mu Burundi hageze ’urukingo’ rw’iki cyorezo rugiye kugeragezwa ruvuye mu Bushinwa.

Ikavuga ko "u Burundi butazigera bwemera kuba ahantu ho kugeragereza urukingo n’iyo rwaba urwa Covid-19".