Perezida w’Ubufaransa Emmanuel Macron yasabye Uburayi n’Amerika kohereza mu buryo bwihutirwa 5% by’inkingo zabyo za Covid-19 mu bihugu biri mu nzira y’amajyambere.

Sponsored Ad

Perezida Macron yabwiye ikinyamakuru Financial Times cyo mu Bwongereza ko kunanirwa gusaranganya inkingo mu buryo burimo gushyira mu gaciro byarushaho kongera ubusumbane ku isi.

Kugeza ubu byinshi mu bikorwa byo gukingira abaturage bimaze gukorwa n’ibihugu bikize.

Perezida Macron yatanze igitekerezo cy’uburyo ubwo busumbane bwavaho, abivuga mbere y’inama yo mu buryo bw’ikoranabuhanga ry’iyakure ihuje ibihugu birindwi bikize kurusha ibindi bizwi nka G7 iba kuri uyu wa gatanu.

Ibiro White House bya Perezida w’Amerika byatangaje ko Perezida Joe Biden agiye gutangaza inkunga ya miliyari 4 z’amadolari yo gufasha muri gahunda yo gusaranganya inkingo ku isi izwi nka Covax.

Biteganyijwe ko Minisitiri w’intebe w’Ubwongereza Boris Johnson - uza kuyobora iyo nama y’ibihugu bikize cyane kurusha ibindi ku isi - aza kwemera inyongera y’inkingo muri gahunda ya Covax.

Kugeza ubu, abantu bagera kuri miliyoni 110 ku isi bamaze gutangazwa ko banduye coronavirus, muri bo abarenga miliyoni 2,4 yarabishe, nkuko imibare ya Kaminuza ya Johns Hopkins yo muri Amerika ibigaragaza.

Macron yavuze iki nyirizina?

Bwana Macron yabwiye ikinyamakuru Financial Times ati: "Ntabwo turimo kuvuga ngo doze [z’inkingo] zibarirwa muri za miliyari zitangwe aka kanya, cyangwa [ngo hatangwe] za miliyari z’amafaranga y’ama-euro".

"Nta cyo bizahindura ku bikorwa byacu by’ikingira, ariko buri gihugu gikwiye gushyira ku ruhande umubare muto w’inkingo kigomba gutanga zibarirwa muri za miliyoni mirongo, ariko vuba cyane, kugira ngo abantu bariya [mu bihugu bicyennye] babone ko zirimo kubageraho".

Perezida Macron yavuze ko umukuru w’Ubudage Angela Merkel ashyigikiye gahunda y’Uburayi yo gusaranganya inkingo, avuga ko yizeye ko Amerika nayo izashyigikira iyo gahunda.

Perezida Macron yavuze ko mu gihe iyo gahunda itashoboka, Ubushinwa n’Uburusiya ari byo bizabikora, "bicire inzira intambara yo kugira ijambo ishingiye ku nkingo".