Kigali
startimes

Sudani y’Epfo: Minisitiri ushinzwe iby’umuryango wa Afurika y’Iburasirazuba yapfuye

Amakuru   Yanditswe na: Dusingizimana Remy 2 June 2020 Yasuwe: 2793

Abategetsi muri iki gihugu bavuga ko Minisitiri John Luk Jok yapfuye mu gitondo uyu munsi kuwa kabiri ari iwe mu rugo nyuma yo gufatwa n’indwara mu ijoro ryacyeye rya tariki ya 01 Kamena 2020.



Bwana Jok yari umuntu uzwi cyane muri politiki ya Sudani y’Epfo, yari mu banditse itegeko nshinga iki gihugu kigenderaho.

Yabaye kandi muri guverinoma nka minisitiri w’ubutabera, uw’amabuye y’agaciro n’ibitoro n’uw’ubwikorezi.

Bimwe mu binyamakuru mu gihugu bivuga ko yaba yazize Covid-19 gusa umwe mu bakozi muri guverinoma yavuze ko Bwana Jok aheruka gupimwa bagasanga nta coronavirus afite.

Liberat Mfumukeko, umunyamabanga w’umuryango wa Afurika y’iburasirazuba (EAC) yatangaje kuri Twitter ko uyu muryango ubabajwe no kubura “umuntu w’umuhanga kandi w’imbaraga, wari mu bagize inama y’abaminisitri y’uyu muryango”.

Imibare y’abanduye coronavirus muri Sudani y’Epfo yarazamutse cyane mu minsi ishize igera kuri 994 n’abantu 10 imaze kwica.

Mu byumweru bibiri bishize, Riek Machar umwe muri ba visi perezida batanu b’iki gihugu, yatangaje ko yanduye iyi virus.

Abandi ba minisitiri 10 n’abategetsi bakuru muri guverinoma bari mu kanama kihariye ko kurwanya Covid-19 nabo byemejwe ko bayanduye.

Urwego rw’ubuzima muri Sudani y’Epfo rwazahajwe n’igihe kinini igihugu kimaze mu ntambara.

Muri iki gihugu habarwa ibitanda 25 bishobora kwakira abarembye cyane (ICU) n’ibyuma bifasha guhumeka (ventilators) enye (4) mu gihugu cy’abaturage miliyoni 12.

Abagize Guverinoma 10 basanzwemo iki cyorezo cya Covid-19 ntibatangajwe bose uretse batatu muri bo barimo visi perezida, minisitiri w’umutekano na minisitiri w’itangazamakuru.

Bose bari mu bagize itsinda ryihariye rya guverinoma ryo kurwanya Covid-19 riyobowe na Perezida Salva Kiir wungirijwe na Visi Perezida Riek Machar.

Kuwa 18 Gicurasi 2020 nibwo Visi Perezida wa Sudani y’Epfo Riek Machar yatangaje kuri televiziyo y’igihugu ko bamupimye bakamusangamo coronavirus, kimwe n’abandi bantu benshi mu bo hafi ye.

Bwana Machar yavuze ko yasuzumwe tariki 13 z’uku kwezi kwa gatanu nyuma y’uko umwe mu itsinda rya guverinoma ryashinzwe kurwanya iki cyorezo bayimusanzemo.

Yavuze ko nta bimenyetso by’iyo ndwara afite ariko agiye kwishyira mu kato mu minsi 14.

Umugore we, uherutse kugirwa minisitiri w’ingabo wa Sudani y’Epfo nawe bamusanzemo iki cyorezo.

Machar yavuze ko na bamwe mu bamurinda n’abakorana nawe babasanzemo Covid-19.

Mu minsi ishize, Umuryango w’abibumbye watangaje ko hari abantu babiri baba mu nkambi z’abavuye mu byabo imbere mu gihugu basanzemo iyi ndwara.

Ibi byateye impungenge ko ishobora gukwirakwira vuba muri izi nkambi zisanzwe zirimo abantu benshi.

Riek Machar n’umwe mu banyapolitiki bavuzwe cyane muri Afurika kubera guhangana cyane na mugenzi we Salva Kiir uyobora Sudani y’Epfo.

Perezida wa Sudani y’Epfo, Salva Kiir, n’uyu bahoze bahanganye Riek Machar bemeranyije gushyiraho leta y’ubumwe muri Gashyantare 2020.

Ibi byaje bikurikiye inama bagiranye mu biro by’umukuru w’igihugu i Juba mbere y’aho.

Imirwano y’amoko

Mu minsi ishize,abategetsi ba Sudani y’Epfo bavuze ko imirwano ya vuba hagati y’amoko muri leta ya Jonglei yiciwemo abantu bagera kuri 300, ibihumbi bavuye mu byabo barahunga.

Muri iyi mirwano ishyamiranyije amoko, hiciwemo abakozi batatu bo mu miryango ifasha, harimo umwe wa Médecins Sans Frontières.

Imirwano yasubukuye mu mpera z’ukwezi gushize hagati y’amoko y’abatunzwe n’ubuhinzi n’abatunzwe n’ubworozi.

Abategetsi bavuze ko abantu bagera kuri 800 bamaze gupfa kuva imirwano nk’iyi yakongera gutangira mu kwezi kwa kabiri.

Amasezerano yo kurangiza intambara mu gihugu yari imaze imyaka itandatu yasinywe mu kwezi kwa kabiri hagati ya Salva Kiir na Riek Machar, gusa amakimbirane y’amoko yakomeje kuba bya hato na hato.

Abantu ibihumbi amagana bari mu nkambi z’ubuhungiro mu gihugu cyabo, mu minsi ishize hari babiri mu mpunzi basanzemo Covid-19, bitera impungenge ko iki cyorezo gishobora gukwira mu mpunzi.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Burundi:Imodoka itwara abagenzi yataye umuhanda igwa mu manga...

Imodoka ya Kompanyi itwara abagenzu yitwa Memento yari ivuye i Makamba...
14 July 2020 Yasuwe: 2594 0

Leta y’Ubufaransa yemeye kongerera abaganga umushahara kubera uko bitwaye mu...

Leta y’Ubufaransa yemeye gutanga miliyari 8 z’ama-euro yo kongerera...
14 July 2020 Yasuwe: 437 0

Impanuka ya Kajugujugu ya gisirikare muri Kenya yahitanye ubuzima...

Mu gitondo cyo kuri uyu wa mbere, nk’uko ibitangazamakuru byo muri Kenya...
14 July 2020 Yasuwe: 1793 0

Zindzi Mandela, umukobwa wa Nelson Mandela, yapfuye

Zindzi Mandela-Hlongwane — umukobwa w’uwahoze ari perezida wa Afurika y’epfo...
13 July 2020 Yasuwe: 3083 1

Perezida Evariste Ndayishimiye yasuye umubyeyi wa nyakwigendera Petero...

Umukuru w’igihugu cy’uBurundi Evariste Ndayishimiye n’umugore we basuye...
12 July 2020 Yasuwe: 15726 1

Burundi: Umugore wa Perezida Ndayishimiye yahembye umugore wabyaye abana 3...

Umugore wa Perezida w’u Burundi witwa Angélique NDAYISHIMIYE yagaragaye ku...
12 July 2020 Yasuwe: 5792 0