Umuryango w’ubumwe bwa Afurika watangaje ko uri kuvugana na leta ya Madagascar ushaka kubona amakuru ya gihanga ngo upime niba uyu muti ntacyo utwaye kandi uvura coronavirus koko.

Sponsored Ad

Uyu muryango uvuga ko nubona amakuru arambuye ibigo byawo byo gukumira no kurwanya ibyorezo (Africa CDC) bizayasuzuma bikareba niba uyu muti wiswe Covid Organics uvura.

Mu itangazo wasohoye, uyu muryango w’ubumwe bwa Afurika uvuga ko iri suzuma rizashingira ku mahame mpuzamahanga n’ibimenyetso bya gihanga ku mikorere y’uyu muti.

Ishami ry’umuryango w’abibumbye rishinzwe ubuzima ku isi, OMS/WHO, rivuga ko nta muti riremeza ko uvura Covid-19.

Ubuvuzi bwifashishije ibimera bugira bufite umwanya munini ku ndwara muri Afurika, ibi na OMS irabyemera ariko ikaburira abantu kuri uwo muti, mu gihe isi yose ikeneye umuti wa coronavirus.

OMS ivuga ko bikwiye ko uyu muti ubanza gusuzumwa no kugeragezwa mu buryo bwa gihanga, ikabwira abantu ko biteye impungenge kwizera imiti idapimye.

Leta ya Madagascar ivuga ko uyu muti wapimwe kandi ukageragezwa n’abahanga b’iki gihugu mbere yo kwemezwa.

Perezida Andry Rajoelina yatangaje ko mu cyumweru gitaha bazatangira no kugerageza urukingo narwo rushingiye ku kimera uyu muti ukozemo.

Abategetsi b’ibihugu bya Guinea Bissau, Equatorial Guinea, Congo na Tanzania bamaze kuvuga ko bakeneye ko Madagascar ibaha kuri uwo muti ukoze mu kimera cya artemisia.

Umugabane wa Afurika umaze kubonekaho abantu barenga 45,000 banduye Covid-19 n’abandi hafi 2,000 imaze kwica.

Ubwo yari ku kigo Malagasy Institute of Applied Research (IMRA) cyakoze umuti unyobwa bivugwa ko uvura Covid-19, imbere y’abaminisitiri, abadipolomate n’abanayamakuru Rajoelina yagize ati:

"Twakoze isuzuma - abantu babiri ubu bakijijwe n’uyu muti.

"Iki ni icyayi cy’ibyatsi kivura mu minsi irindwi".

Mu kuwushimangira yagize ati: "Ninjye wa mbere uri buwunywe uyu munsi imbere yanyu, mubone ko ukiza kandi utica".

Uyu muti wiswe Covid-Organics, ukozwe mu byatsi byitwa Artemisia - umuti byemejwe ko bikoreshwa mu kuvura Malaria - hamwe n’ibintu byatsi gakondo nk’uko ikigo IMRA kibivuga.

Ubuziranenge bwawo no kuba uvura Covid-19 koko ntabwo biragenzurwa ku rwego mpuzamahanga, nta mibare kandi itangwa n’ubushakashatsi bw’uko wageragejwe.

Abahanga muri siyansi bakomeje kuburira abantu ingaruka mbi bashobora guterwa no gukoresha imiti inyobwa itarapimwe ikozwe mu byatsi .

Bwana Rajoelina ibyo abishyira ku ruhande, avuga ko uwo muti uzahabwa abana b’abanyeshuri mu gihugu kuko ari "inshingano ye kurengera abaturage ba Madagascar".