Abagabo bitwaje imbunda bambaye n’udupfukamunwa binjiye muri studio ya televiziyo yarimo itanga ibiganiro biri kuba [live] bafata mpiri abakozi bari buzuye ubwoba.

Sponsored Ad

Abakozi bategetswe kuryama hasi ubwo iyo TV y’igihugu TC yo mu mujyi wa Guayaquil yarimo ikora ibiganiro mu buryo bwa live.

Polisi ivuga ko yabohoje aba bakozi bose, maze ifunga abantu 13 muri aba bitwaje intwaro,yerekana n’intwaro yafashe.

Abantu nibura 10 ni bo bamaze kwicwa kuva hatangajwe amategeko yo mu bihe bidasanzwe y’iminsi 60 muri Equateur/ Ecuador ku wa mbere.

Aya mategeko adasanzwe yatangajwe nyuma y’aho umugizi wa nabi kabuhariwe atorotse gereza yari afungiyemo.

Ntibiramenyekana neza niba iki gitero gifitanye isano n’iri toroka muri uyu mujyi usanzwe ubamo umukuru w’umutwe w’abagizi ba nabi uzwi nka Choneros, Adolfo Macías Villamar,uzwi cyane ku izina rya Fito.

Mu gihugu baturanye cya Peru,leta yategetse polisi kohereza ingabo ku mupaka kugira ngo zizibire umutekano muke ntuhave utandukira ubutaka bwacyo.

Leta Zunze Ubumwe za Amerika ziramagana ibi “bitero biteye isoni” muri Equateur kandi ko zirimo “gukorana mu buryo bwa hafi” n’umukuru w’igihugu Daniel Noboa na leta ye, kandi ko “ziteguye gufasha”.

Equateur ni kimwe mu bihugu bya mbere kw’isi bigemura ibitoke hanze, ariko kandi kikaba kigemura amavuta, ikawa, cocoa, hamwe n’amafi y’ubwoko butandukanye.

Muri iki gitero cya mu ijoro ryo ku wa kabiri mu nyubako y’iyi TV, umwe muri aba bateye afatiye imbunda nini kuri umwe mu bari bafashwe mpiri, yongera aterwa n’ubwoba n’umwe wari ufite imbunda ntoya yo mu bwoko bwa revolver.

Humvikanye ijwi ry’umugore atakamba ati, "Ntimurase, ndabasabye ntimurase", nk’uko byandikwa n’ibiro ntaramakuru AFP, mu gihe humvikana umuntu arimo araboroga bisa nk’aho yari ababaye.

Mu butumwa bwa WhatsApp, umukozi yabwiye AFP ati: "Ni ukuri, binjiye baje kutwica. Mana ntiwemere ko ibi biba. Abagizi na nabi barimo gukurikiranwa."

Polisi yashize ku mbuga nkoranyambaga videwo yerekana abakekwa gukora iki gitero bafunzwe, kikavuga ko abagikoze “bagomba guhanwa kubera ibikorwa by’iterabwoba”.

BBC