skol
startimes

Ethiopia – Tigray: Ibisasu bya rokete byaguye mu nkengero z’umurwa mukuru wa Eritrea

Amakuru   Yanditswe na: Dusingizimana Remy 15 November 2020 Yasuwe: 1273

Ibisasu bya rokete byarasiwe mu karere ka Tigray ko mu majyaruguru ya Ethiopia birenga umupaka bigwa mu murwa mukuru wa Eritrea, nkuko ibitangazamakuru byaho n’abahagarariye ibihugu by’amahanga babivuga.


Humvikanye ibiturika mu murwa mukuru Asmara ubwo ibisasu bya rokete byinshi byagwaga mu nkengero y’uyu mujyi, ariko nta makuru yahise atangazwa y’abakomeretse.

Ishyaka riri ku butegetsi muri leta ya Tigray - iri mu ntambara na leta ya Ethiopia - ryari ryakangishije ko rizagaba igitero kuri Eritrea.

Mbere yaho, ingabo zo muri iyi leta zari zarashe ibindi bisasu bya rokete mu kandi karere ka Ethiopia.

Tigray People’s Liberation Front (TPLF) yavuze ko ku wa gatanu yarashe ahantu habiri ho muri leta ya Amhara - nayo ni imwe mu zigize Ethiopia - ndetse iburira ko izagaba ibindi bitero.

Ubushyamirane hagati ya TPLF na leta ya Ethiopia bwarushijeho kwiyongera mu kwezi gushize.

Mu myaka igera kuri 20 ishize, Eritrea yarwanye na Ethiopia, intambara isozwa n’amasezerano y’amahoro yemeranyijweho mu mwaka wa 2018.

Imirwano muri Tigray yanagize ingaruka kuri Sudan, ahamaze guhungira abaturage b’abasivile batari munsi ya 17,000, nkuko umuryango w’abibumbye (ONU/UN) ubitangaza.

Byagenze gute muri Eritrea?

Ku wa gatandatu nijoro, abatuye i Asmara batangaje ko bumvise ibintu biturika cyane.

Umudipolomate utatangajwe izina yabwiye ibiro ntaramakuru AFP ati: "Amakuru turimo kubona asobanura ko byinshi mu bisasu bya rokete byaguye hafi y’ikibuga cy’indege".

Urubuga rw’amakuru Tesfa rwo muri Eritrea rwatangaje kuri Twitter ko ibisasu bibiri bya rokete byarasiwe mu karere kagenzurwa na TPLF muri Tigray byahushije ikibuga cy’indege bigwa mu nkengero y’umujyi.

Mbere yaho, umuvugizi wa TPLF yari yakangishije kugaba ibitero bya misile kuri Eritrea, ashinja ingabo za Eritrea kwambuka umupaka gushyigikira ingabo za Ethiopia mu ntambara zirwana na TPLF.

Leta ya Eritrea yahakanye kugira uruhare urwo ari rwo rwose muri iyo mirwano, ariko umunyamakuru wa BBC Will Ross avuga ko kuba hari amakuru y’imirwano ku mupaka, ndetse n’amakuru yuko abasirikare barimo kuvurirwa mu bitaro byo muri Eritrea, bica amarenga ko ibitandukanye n’ibyo Eritrea ivuga ari byo kuri.

Abagabo babiri bahuje umwanzi

Isesengura rya Will Ross, umunyamakuru wa BBC

Mu gihe ibisasu birimo kuraswa muri Eritrea, iyi mirwano ubu yamaze gukara cyane kurushaho ndetse birashoboka ko byagorana cyane kuyihagarika. Ingaruka zayo ubu zishobora guteza umutekano mucye muri aka karere kose k’ihembe ry’Afurika.

Ariko abantu benshi bakurikiranira hafi ibyaranze politike yo mu gihe cya vuba gishize muri aka karere, bari baraguje umutwe ko intambara irimo gututumba ubwo Minisitiri w’intebe wa Ethiopia Abiy Ahmed yahindukaga inshuti y’umutegetsi w’umunyagitugu wa Eritrea, Isaias Afwerki.

None ubu aba bagabo babiri bafite umwanzi umwe - abanyapolitike bari ku butegetsi muri Tigray, bamaze imyaka ari bo bategeka Ethiopia mbere yuko Bwana Abiy agera ku butegetsi, harimo no mu gihe Ethiopia yari irimo irwana na Eritrea mu ntambara yo ku mupaka yahitanye ababarirwa mu bihumbi za mirongo.

Kugeza ubu ubusabe bw’amahanga bwuko habaho ibiganiro hagati y’impande zombi bwarirengagijwe, mu gihe abaturage b’abasivile babarirwa mu bihumbi bakomeje guhunga imirwano berekeza mu gihugu gituranyi cya Sudan.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Ethiopia: Abiy Ahmed yahaye ingabo za Tigray amasaha 72 ngo zibe zamanitse...

Minisitiri w’intebe wa Ethiopia yahaye amasaha 72 ingabo za leta ya Tigray...
23 November 2020 Yasuwe: 491 0

Ethiopia yashyizeho impapuro zo gufata abasirikare bakuru bacyekwaho...

Leta ya Ethiopia yashyizeho impapuro zo guta muri yombi abasirikare bakuru...
19 November 2020 Yasuwe: 1192 0

Umucuruzi wa serivisi zo guhererekanya amafaranga yafatanywe 100,000 FRW...

Mu gitondo cyo ku wa Kabiri tariki ya 17 Ugushyingo 2020, Polisi y’u Rwanda...
19 November 2020 Yasuwe: 989 0

Ingabo za Ethiopia ziri kujya mu murwa mukuru wa Tigray

Ethiopia ivuga ko ingabo zayo zigaruriye ahantu hanini mu leta ya Tigray...
18 November 2020 Yasuwe: 2921 0

Ethiopia: Abiy Ahmed yatangaje igitero simusiga ku murwa mukuru wa...

Minisitiri w’intebe wa Ethiopia Abiy Ahmed yavuze ko igihe ntarengwa cyari...
17 November 2020 Yasuwe: 2323 0

Ethiopia – Tigray: Ibisasu bya rokete byaguye mu nkengero z’umurwa mukuru wa...

Ibisasu bya rokete byarasiwe mu karere ka Tigray ko mu majyaruguru ya...
15 November 2020 Yasuwe: 1273 0