Abayobozi b’ingabo zo mu ntara ya Amhara muri Ethiopia bashinje ubuyobozi bwo mu baturanyi ba Tigray "kuvuza ingoma y’intambara" kubera gahunda yo gusubiza ibihumbi amagana by’Abanya Tigray mu turere abarwanyi ba Amhara bigaruriye mu gihe cy’intambara y’abenegihugu.

Sponsored Ad

Ahazaza h’utwo turere tutavugwaho rumwe mu majyaruguru ya Ethiopia twakomeje guteza umwuka mubi hagati ya Tigray na Amhara kuva intambara yo mu 2020-2022 yarangira, aho abarwanyi ba Amhara barwaniye bafatanyije n’Ingabo za guverinoma barwanya ingabo za Tigray.

Ibihumbi amagana byaguye mu ntambara. Rumwe mu rugomo rukabije rwabereye mu turere twombi, tugize uduce two mu majyepfo no mu burengerazuba bwa Tigray. Ibihumbi n’ibihumbi by’Abanya-Tigray barahunze, abarwanyi ba Amhara bahashyira ubuyobozi bwabo bwite.

Ku wa Gatatu, visi perezida w’ubuyobozi bw’agateganyo bwa Tigray, Gen. Tadesse Worede, yatangaje ko abayobozi ba Tigray bemeranijwe na guverinoma nkuru kurangiza gahunda yo gucyura abakuwe mu byabo, bitarenze ku itariki ya 7 Kamena mu karere kamwe na 7 Nyakanga mu kandi karere.

Tadesse yavuze ko abarwanyi bo muri kariya gace bazamburwa intwaro kandi hagashingwa ubuyobozi bushya bw’inzego z’ibanze. Minisitiri w’ingabo w’igihugu mbere yari yijeje gusenya "ubuyobozi butemewe" muri utwo turere.

Umuvugizi wa guverinoma nkuru ntiyigeze asubiza icyifuzo cya Reuters gisaba ibisobanuro ku magambo ya Tadesse.

Abanya-Amhara bavuga ko bafite uburenganzira mu mateka kuri ubwo butaka, kandi abayobozi b’ingabo za Amhara zizwi ku izina rya FANO bavuze ko amagambo ya Tadesse ari ubushotoranyi.

Kuri uyu wa Kane ushize, Beyene Alamaw, uhagarariye ishami rya FANO mu gace ka Gondar, yabwiye ikinyamakuru cyo kuri interineti ati: "Barimo kuvuza ingoma y’intambara. Ntabwo tuzihanganira umuntu uwo ari we wese uzgerageza gukoresha ingufu no gutera."

Abayobozi baturutse mu mashami ane ya FANO bari bahagarariwe muri icyo kiganiro.

Mu kwezi gushize, mu ihohoterwa rikomeye kuva intambara irangiye, habaye imirwano hagati y’Abanya-Amharas n’Abanya- Tigray bitwaje intwaro muri kamwe mu turere tutavugwaho rumwe, bituma abantu bagera ku 50.000 bahunga nk’uko Umuryango w’Abibumbye ubitangaza.