Umukuru w’ububanyi n’amahanga mu muryango w’Ubumwe bw’Uburayi (EU/UE) yavuze ko EU igomba gufata nk’ibintu bishoboka ibikangisho bya Perezida Vladimir Putin byuko ashobora gukoresha intwaro kirimbuzi mu ntambara yo muri Ukraine.
Josep Borrel yabwiye umunyamakuru wa BBC Lyse Doucet ko intambara yageze mu "gihe giteje akaga".
Avuze aya magambo mu gihe Uburusiya bwatangiye gukangurira bamwe mu baturage babwo kwitabira intambara, ndetse bukaba bushaka kwiyomekaho uturere tune two muri Ukraine. (...)

Sponsored Ad

Umukuru w’ububanyi n’amahanga mu muryango w’Ubumwe bw’Uburayi (EU/UE) yavuze ko EU igomba gufata nk’ibintu bishoboka ibikangisho bya Perezida Vladimir Putin byuko ashobora gukoresha intwaro kirimbuzi mu ntambara yo muri Ukraine.

Josep Borrel yabwiye umunyamakuru wa BBC Lyse Doucet ko intambara yageze mu "gihe giteje akaga".

Avuze aya magambo mu gihe Uburusiya bwatangiye gukangurira bamwe mu baturage babwo kwitabira intambara, ndetse bukaba bushaka kwiyomekaho uturere tune two muri Ukraine.

Ku rugamba, Putin yahuye n’ingorane, abasirikare be bakubitwa inshuro (basubizwa inyuma) n’igitero cyo kubigaranzura cy’abasirikare ba Ukraine.

Borrell yagize ati: "Rwose ni igihe giteje akaga kuko igisirikare cy’Uburusiya cyasunikiwe mu iguni, kandi uko Putin yabyakiriye - gukangisha gukoresha intwaro kirimbuzi - ni bibi cyane".

Nyuma y’amezi arindwi ashize Uburusiya bugabye igitero kuri Ukraine, abasesenguzi bamwe bemeza ko abasirikare ba Perezida Putin bari gusubira inyuma, ariko Borrell yavuze ko "igisubizo kinyuze mu nzira ya diplomasi" kigomba kugerwaho.

Yavuze ko icyo gisubizo ari "ikibungabunga ubusugire n’ukutavogerwa kw’ubutaka bwa Ukraine".

Yagize ati: "Bitabye ibyo, dushobora kurangiza intambara, ariko ntituzagira amahoro, kandi tuzagira indi ntambara".

Mu ijambo ry’imbonekarimwe yagejeje ku gihugu muri iki cyumweru, Putin yavuze ko igihugu cye gifite "intwaro kirimbuzi zitandukanye" kandi "nzakoresha uburyo bwose dufite", yongeraho ati: "Ntabwo ndimo gukangata [kwirarira]".

Borrell yagize ati: "Iyo abantu bavuze ko atari ugukangata, ugomba kumva ko bakomeje [batarimo gukina]".

Muri iryo jambo kandi, Perezida Putin yanatangaje ko yahamagaje Abarusiya 300,000 - bari baritabiriye igisirikare mu buryo busanzwe bw’itegeko ku baturage b’iki gihugu bwo kujya mu gisirikare mu gihe runaka - ngo binjire mu gisirikare.

Ibyo byateje imyigaragambyo, ndetse hari amakuru ko hari abantu bahunze igihugu kugira ngo batoherezwa ku rugamba.

Bibaye nyuma y’igitero cyihuse cya Ukraine cyo kwigaranzura Uburusiya, Ukraine ivuga ko cyatumye yisubiza ubutaka buri kuri kilometero kare (km²) zirenga 8,000 ibwambuye abasirikare b’Uburusiya.

Ubu, ayiswe amatora ya kamarampaka ku kwinjira mu Burusiya arimo gukorerwa mu turere tune two muri Ukraine - ari two Luhansk, Donetsk, Kherson na Zaporizhzhia.

Ukraine yamaganye uku kugerageza kwiyomekaho ubutaka bwayo, ndetse ivuga ko abasirikare b’Uburusiya bitwaje intwaro barimo kugenda umuryango (urugi) ku wundi bakusanya amajwi.

Borrell yapfobeje impungenge zuko intwaro EU yoherereza Ukraine zirimo kuba nkeya, anavuga ko EU igomba gukomeza guha Ukraine ubufasha bwa gisirikare, ndetse no gushyira mu bikorwa ibihano byo mu rwego rw’ubukungu kuri Perezida Putin n’inshuti ze no gukora igikorwa cyo mu rwego rwa diplomasi.

Yemeye ko ibiciro birimo gutumbagira by’ingufu z’amashanyarazi (umuyagankuba mu Kirundi), byatewe n’intambara yo muri Ukraine, ari ikibazo gihangayikishije.

Uyu munyapolitike w’Umunya-Espagne yagize ati: "Abaturage bo mu gihugu cyanjye bambwira ko igiciro cya gas [gaz] gisobanuye ko tudashobora gukomeza gukora, ntidushobora gukomeza gukora ubucuruzi".

Yongeyeho ko izo mpungenge yanazumvanye abategetsi bo muri Afurika, muri Amerika y’epfo no muri Aziya y’amajyepfo ashyira uburasirazuba.

Borrell yasabye Perezida Putin gutanga umusanzu we mu gutuma hagerwa ku gisubizo kinyuze mu biganiro, avuga ko "kugira ngo ubyine [imbyino ya] tango, bisaba abantu babiri".

Yagize ati: "Buri muntu wese wagiye i Moscow, muri Kremlin [ibiro bya perezida] kuganira na Putin, yagarukanye igisubizo gisa:

"’Jyewe [Putin] mfite intego za gisirikare kandi nintagera kuri izi ntego za gisirikare nzakomeza kurwana’.

"Iki rwose ni icyerekezo gihangayikishije, ariko tugomba gukomeza gufasha Ukraine".

BBC