Ibihugu by’inshuti za Ukraine birangajwe imbere n’ibyo mu muryango w’ubwirinzi bwa gisirikare bw’Uburayi n’Amerika (OTAN/NATO) byatangaje ko byemeye guha Ukraine intwaro zigezweho z’ubwirinzi bwo mu kirere, nyuma y’inkubiri y’ibitero bya misile by’Uburusiya.
Intwaro zasezeranyijwe n’Ubwongereza, Canada, Ubufaransa n’Ubuholandi zirimo misile n’ubwirinzi bwo kugenzura indege buzwi nka radar.
Mbere yaho, Amerika na yo yari yemeye gutanga imfashanyo nk’iyo. Uburyo bumwe bw’ikoranabuhanga ryo ku rwego rwo (...)

Sponsored Ad

Ibihugu by’inshuti za Ukraine birangajwe imbere n’ibyo mu muryango w’ubwirinzi bwa gisirikare bw’Uburayi n’Amerika (OTAN/NATO) byatangaje ko byemeye guha Ukraine intwaro zigezweho z’ubwirinzi bwo mu kirere, nyuma y’inkubiri y’ibitero bya misile by’Uburusiya.

Intwaro zasezeranyijwe n’Ubwongereza, Canada, Ubufaransa n’Ubuholandi zirimo misile n’ubwirinzi bwo kugenzura indege buzwi nka radar.

Mbere yaho, Amerika na yo yari yemeye gutanga imfashanyo nk’iyo. Uburyo bumwe bw’ikoranabuhanga ryo ku rwego rwo hejuru bw’Ubudage bwamaze kugera muri Ukraine.

Iyo mfashanyo yasezeranyijwe Ukraine nyuma yuko inshuti za Ukraine zo mu bihugu 50 ziteraniye mu nama ku cyicaro gikuru cya OTAN i Buruseli mu Bubiligi.

Ukraine yashimye iyo nama ivuga ko "yanditse amateka".

Ukraine ivuga ko Uburusiya bwarashe misile zirenga 100 ndetse bukoresha indege ntoya zitarimo umupilote (drones) zibarirwa muri za mirongo ku wa mbere no ku wa kabiri, bukubita ku bikorwa-remezo by’amashanyarazi ndetse no ku handi hantu hadakorerwa n’igisirikare.

Abantu batari munsi ya 19 barishwe ku munsi wa mbere w’ibyo bitero.

Ibyo bitero byanatumye umuriro w’amashanyarazi ubura mu bice byinshi by’igihugu ndetse n’imiyoboro y’amazi irahungabana mu mijyi imwe ya Ukraine.

Abategetsi bo mu murwa mukuru Kyiv byabaye ngombwa ko bakoresha uburyo bwo gusaranganya umuriro w’amashanyarazi, ibice bimwe bikaba biwubonye mu gihe ibindi bibaye biwubuze.

Perezida w’Uburusiya Vladimir Putin avuga ko ibyo bitero byari ibyo kwihimura ku gitero ku iteme rikomeye rihuza Uburusiya na Crimea - uyu ukaba ari umwigimbakirwa Uburusiya bwiyometseho mu 2014 buwukuye kuri Ukraine.

Uburusiya buvuga ko icyo giturika cyo ku wa gatandatu cyateguwe n’urwego rw’ubutasi rwa Ukraine - ibyo Ukraine yapfobeje ivuga ko nta shingiro bifite.

Ubwongereza buzaha Ukraine imfashanyo ya misile z’ubwirinzi bwo mu kirere, hamwe na drones zibarirwa mu magana zo gufasha ubushobozi bwa Ukraine bwo gukusanya amakuru ndetse n’ubw’ibikoresho.

Ubwongereza buzanayiha imbunda 18 za rutura zo mu bwoko bwa howitzer, ziyongera ku mbunda nk’izo za rutura 64 busanzwe bwaramaze guha Ukraine.

Minisitiri w’ingabo w’Ubwongereza Ben Wallace yagize ati: "Ibitero bya vuba aha bitarobanura by’Uburusiya ku duce dutuwemo n’abasivile muri Ukraine bituma habaho ishingiro ryo guha indi mfashanyo abashaka kurwana ku gihugu cyabo.

"Izi ntwaro zizafasha Ukraine kurinda ikirere cyayo ibitero ndetse muri rusange zongerere imbaraga ubwirinzi bwayo bwa misile".

Avuga nyuma y’iyo nama y’i Buruseli ku wa gatatu, Minisitiri w’ingabo w’Amerika Lloyd Austin yavuze ko "tugiye gukora ikintu cyose dushoboye mu gutuma [Abanya-Ukraine] bagira igicyenewe kugira ngo batange umusaruro bifuza".

Perezida w’Ubufaransa Emmanuel Macron yavuze ko Ubufaransa buzaha Ukraine ubwirinzi bwo mu kirere.

Mu kiganiro na televiziyo France 2, ntabwo yavuze nyirizina ubwo bwirinzi buzohererezwa Ukraine. Ariko yavuze ko akamaro kabwo k’ingenzi ari ukurinda abaturage za drones.

Ubuholandi bwavuze ko buzaha Ukraine imfashanyo y’ubwirinzi bwo mu kirere bwa misile ifite agaciro ka miliyoni 15 z’ama-Euro.

Minisitiri w’ingabo w’Ubuholandi Kajsa Ollongren yavuze ko ibitero by’Uburusiya "nta kindi gishoboka byahura na cyo kitari ubufasha budacogora kuri Ukraine n’abaturage bayo".

Canada yasezeranyije guha Ukraine imfashanyo ya gisirikare ifite agaciro ka miliyoni zirenga 47 z’amadolari ya Canada, irimo n’itumanaho rikoresha umurongo w’icyogajuru (satellite) hamwe na za kamera (camera) za drone.

Ubwongereza bwitezwe gutangaza vuba aha intwaro bwemereye Ukraine.

Hagati aho, igisirikare cya Ukraine mbere yaho ku wa gatatu cyatangaje ko ubwa mbere muri bwinshi mu bwirinzi "bugezweho bwa IRIS-T SLM bwagejejwe kuri Ukraine buvuye mu Budage".

Igisirikare cya Ukraine cyavuze ko ubwo bwirinzi bwo mu kirere buzafasha mu kurinda igihugu "iterabwoba".

Perezida wa Ukraine Volodymyr Zelensky amaze amezi asaba inshuti za Ukraine kuyiha ubwirinzi bwo mu kirere bwo gutuma ishyiraho "ingabo yo mu kirere" ikingira Ukraine.

Mu ijambo ryo mu buryo bwa videwo yavuze ku wa gatatu nijoro, Perezida Zelensky yagize ati:

"Uko iterabwoba ry’Uburusiya rirushaho kubamo ubwihanduzacumu [gutinyuka] rikanarushaho kubamo ubugome, ni ko birushaho kugaragarira isi ko gufasha Ukraine kurinda ikirere ari kimwe mu bikorwa by’ingenzi cyane by’ubutabazi ku Burayi byo muri iki gihe cyacu".

Yongeyeho ati: "Nemera ko iki gikorwa tuzagishobora".

Uburusiya bwakomeje kuburira inshuti za Ukraine buzisaba kwirinda guha Ukraine intwaro zigezweho, bushimangira ko ibi byatuma zifatwa nk’iziri muri iyi ntambara Perezida Putin yatangije kuri Ukraine ku itariki ya 24 y’ukwezi kwa kabiri uyu mwaka.

Uburengerazuba (Uburayi n’Amerika) bwashinje Uburusiya gukangisha intwaro kirimbuzi, nyuma y’urukurikirane rwo gutsindwa ku rugamba kw’igisirikare cy’Uburusiya.

BBC