Kuri uyu mbere tariki ya 28 Ugushyingo 2022,hatangiye ibiganiro bigamije gushaka umuti ku bibazo by’umutekano muke mu Burasirazuba bwa RDC biri kubera I Nairobi muri Kenya.
Ibi biganiro byitabiriwe n’abahagarariye imitwe yitwaje intwaro irenga 40, nk’uko radio okapi ibivuga ndetse n’abahagarariye imiryango itegamiye kuri leta mu ntara za Kivu zombi, Ituri, Tanganyika na Maniema.
Ubu bari i Nairobi mu biganiro by’iminsi itandatu na leta ya Kinshasa, byo gushaka amahoro mu burasirazuba bwa (...)

Sponsored Ad

Kuri uyu mbere tariki ya 28 Ugushyingo 2022,hatangiye ibiganiro bigamije gushaka umuti ku bibazo by’umutekano muke mu Burasirazuba bwa RDC biri kubera I Nairobi muri Kenya.

Ibi biganiro byitabiriwe n’abahagarariye imitwe yitwaje intwaro irenga 40, nk’uko radio okapi ibivuga ndetse n’abahagarariye imiryango itegamiye kuri leta mu ntara za Kivu zombi, Ituri, Tanganyika na Maniema.

Ubu bari i Nairobi mu biganiro by’iminsi itandatu na leta ya Kinshasa, byo gushaka amahoro mu burasirazuba bwa Congo.

Umutwe wa M23 ntabwo watumiwe muri ibi biganiro, nk’uko umuvugizi wawo yabibwiye BBC,kuri iki cyumweru.

Leta ya Kinshasa irahagararirwa na minisitiri w’ububanyi n’amahanga Christophe Lutundula.

Ibiganiro biratangizwa kandi bikuriwe na Perezida Evariste Ndayishimiye w’u Burundi, ubu ukuriye umuryango wa EAC.

Iyi nama y’i Nairobi igiye kuba ikurikira indi yabaye muri Kamena 2022, yiga ku kibazo cy’umutekano muri RDC. Yahuje Perezida Paul Kagame, Yoweri Museveni wa Uganda, Evariste Ndayishimiye w’u Burundi, Salva Kiir Mayardit wa Sudani y’Epfo na Félix Tshisekedi wa RDC.

Ni ibiganiro bigiye kuba nyuma y’aho Umutwe wa M23 utangaje ko wahagaritse imirwano ariko ugasaba guhura n’abahuza barimo Perezida wa Angola, João Lourenço na Uhuru Kenyatta wabaye Perezida wa Kenya haganirwe ku mpungenge zayo mu buryo bugamije kubaka amahoro arambye muri iki gihugu.

Babikoze nyuma y’iminsi mike Inama yahuje Perezida João Lourenço wa Angola; Evariste Ndayishimiye w’u Burundi na Félix Antoine Tshisekedi wa RDC; Minisitiri w’Ububanyi n’Amahanga w’u Rwanda, Dr Vincent Biruta na Uhuru Kenyatta wahoze ari Perezida wa Kenya, i Luanda ugategeka ko guhagarika imirwano ukava no mu duce twa RDC wafashe.

M23 yemeye guhagarika imirwano nk’uko byasabwe n’abakuru b’ibihugu,ariko mu gitondo cyo kuwa Gatandatu ihita iyikomeza nubwo ivuga ko yatewe ikirwanaho.

Leta ya Kinshasa ishinja M23 kuba ari umutwe w’iterabwoba, mu gihe yo ivuga ko irwanira uburenganzira bw’abaturage b’iki gihugu bavuga Ikinyarwanda bagiye bicwa bakanahezwa.

M23 ivuga ko yahisemo kubura imirwano kuko amasezerano n’ibiganiro yagiye igirana na Perezida Tshisekedi byarengejwe ingohe kandi nyamara ari byo byari byitezweho umuti ku bibazo imaze igihe igaragaza.