Umukozi wo ku kibuga cy’indege muri leta ya Texas muri Amerika yapfuye nyuma yo gufatwa muri moteri y’indege itwara abagenzi.

Sponsored Ad

Abategetsi bavuze ko uwo mukozi "yamizwe" na moteri y’indege ya kompanyi Delta yari irimo igenda gahoro yerekeza ku muryango wayo mbere yuko ihaguruka, moteri imwe yayo icanye.

Abakoresha b’uwo mukozi bavuga ko iperereza ry’ibanze ryerekana ko ibyabaye nta ho bihuriye n’ingamba zisanzweho z’umutekano, ariko ntibiramenyekana uko byagenze.

Iperereza ririmo no gukorwa n’ikigo cya leta.

Ikigo gikora amaperereza ku mpanuka zo mu rwego rwo gutwara abantu n’ibintu, kizwi nka National Transportation Safety Board, cyavuze ko cyavuganye na kompanyi Delta Air Lines kandi ko "kuri ubu turi mu gikorwa cyo gukusanya amakuru".

Abategetsi ntibaratangaza izina ry’uwo mukozi wa kompanyi Unifi Aviation, yahawe akazi na kompanyi Delta Air Lines ko mu bikorwa byo kwita ku ndege ku kibuga.

Iyo kompanyi yagize iti: "Tugendeye ku iperereza ry’ibanze ryacu, ibi byabaye nta ho byari bihuriye n’imikorere n’ingamba z’umutekano za Unifi".

Umuvugizi wa Delta yavuze ko iyo kompanyi y’indege "ishenguwe umutima" no kubura ubuzima kw’umwe mu bagize umuryango wo gutwara abantu mu ndege.

Ku wa gatatu, kompanyi y’indege Piedmont ikorera muri ako karere yaciwe amande y’amadolari y’Amerika 15,625 (miliyoni 17Frw) n’ikigo kigenzura imikorere n’ibibazo by’umutekano ku kazi, cyitwa Occupational Safety and Health Administration (OSHA).

Hari nyuma y’urupfu rw’umukozi ukora ku kibuga rwabaye mu mezi atandatu ashize muri leta ya Alabama, wapfuye mu buryo nk’ubw’uwo wa kompanyi Delta.

Ikigo OSHA cyagize kiti: "Amahugurwa nyayo n’ikurikizwa ry’ingamba z’umutekano byashoboraga gutuma ibi byago bitaba".