Kuri uyu wa Gatatu, itariki ya 23 Kanama 2023, Komiseri mukuru wa polisi muri Kasai muri Repubulika ya Demokarasi ya Congo, Donatien Mikanda Godefroid, yapfuye arashwe n’amabandi amusanze iwe mu rugo ruherereye muri Tshikapa.

Sponsored Ad

Abaturanyi be bo mu gace ka Kamalenga, bumvise urusaku rw’amasasu rwabakanguye, batangaje ko ibi byabaye saa cyenda z’urukerera.

Barinubira bati: "Turinubira ubwiyongere bw’umutekano muke muri Tshikapa, ibintu bimaze kurenga abayobozi kandi birafata intera iteye impungenge. Iki kibazo kandi kiragabanya icyizere cy’abaturage kuri serivisi z’umutekano". Bamwe muri bo bakeka ku rundi ruhande ko uyu mupolisi yaba yishwe n’abantu bari bafitanye ikibazo.

Hagati aho, Gen. Sylvano Kasongo, ukuriye Igipolisi cya Congo utegerejwe muri Tshikapa mu minsi iri imbere, yahamagariye abaturage gutuza kandi atangaza ko iperereza rizakorwa na serivisi ze kugira ngo abakoze icyaha batabwe muri yombi.

Kugeza ubu, umurambo wa komiseri mukuru wajyanwe mu buruhukiro bw’ibitaro bikuru bya Tshikapa nk’uko iyi nkuru dukesha Mediacongo.net ivuga.

Guverinoma y’intara, ku ruhande rwayo, yerekana ko ingamba nyinshi zashyizwe mu bikorwa n’inama z’umutekano z’inzego z’ibanze kugira ngo iki kibazo gikemuke, cyane cyane nko kubuza ingendo z’amapikipiki y’abantu ku giti cyabo guhera saa tatu z’ijoro no kongera amarondo ahuriweho hagati ya polisi n’igisirikare.

Iyicwa ry’uyu mupolisi rije rije nyuma y’amezi macye y’iyicwa y’umushinjacyaha mukuru mu rukiko rw’amahoro rwa Tshikapa.