Umuntu umwe yaraye apfiriye mu kwiyamamaza k’umunyaporitike Moïse Katumbi utavuga rumwe n’ubutegetsi muri Repubulika ya Demokarasi ya Congo, nk’uko bitangazwa n’ishyaka rye.

Sponsored Ad

Urupfu rw’uyu muntu rwabaye ejo ku wa kabiri ubwo Katumbi n’abanatu be barimo berekeza aho yagombaga kwiyamamariza mu mujyi wa Kindu uri mu majyepfo ashyira uburasirazuba nkuko bitangazwa n’abategetsi.

Hervé Diakiese, umuvugizi w’Ishyaka Ensemble pour la République, avuga ko abari bitabiriye uku kwiyamamaza batewe amasasu n’amabuye, kandi ko bamwe mu barwanashyaka bakomeretse.

Abategetsi b’ako karere ntacyo baravuga kuri uru rupfu. Hagati aho, Peter Kazadi, Minisitiri w’umutekano, asaba abiyamamariza umwanya w’umukuru w’igihugu kubahiriza ibyo basabwa n’abayoboye uturere mu gihe cyo kwiyamamaza.

Abiyamamariza umwanya w’umukuru w’igihugu 23 batangiye kuzenguruka iki gihugu kinini cyane cyo muri Afrika yo hagati, kingana n’Uburayi bw’Uburengerazuba.

Uyu ni we muntu wa mbere upfiriye muri uku kwiyamamaza mu matora y’umukuru w’igihugu kumaze iminsi icyenda gutangiye ndetse kukaba kuzamara ukwezi kwose.

Aya matora ateganyijwe ku wa 20 Ukuboza 2023.

BBC