Abanyamakuru batandatu muri Sudani y’Epfo barafunzwe bahorwa ko bakwirakwije videwo isa n’iyerekana Perezida Salva Kiir yinyarira, nk’uko bivugwa n’amashyirahamwe aharanira uburenganzira bw’abanyamakuru.
Mu kwezi gushize hari videwo yahanahanywe ku mbuga Nkoranyambaga yerekana Perezida Kiir yinyarira mu gihe haririmbwaga indirimbo yubahiriza igihugu mu birori.
Abanyamakuru batandatu ba Radiyo y’igihugu barafunzwe muri iki cyumweru.
Ishyirahamwe Comité pour la Protection des (...)

Sponsored Ad

Abanyamakuru batandatu muri Sudani y’Epfo barafunzwe bahorwa ko bakwirakwije videwo isa n’iyerekana Perezida Salva Kiir yinyarira, nk’uko bivugwa n’amashyirahamwe aharanira uburenganzira bw’abanyamakuru.

Mu kwezi gushize hari videwo yahanahanywe ku mbuga Nkoranyambaga yerekana Perezida Kiir yinyarira mu gihe haririmbwaga indirimbo yubahiriza igihugu mu birori.

Abanyamakuru batandatu ba Radiyo y’igihugu barafunzwe muri iki cyumweru.

Ishyirahamwe Comité pour la Protection des Journalistes/Committee to Protect Journalists (CPJ) ririmo gusaba ko aba banyamakuru barekurwa.

Patrick Oyet, umukuru w’ishyirahamwe ry’abanyamakuru ba Sudani y’Epfo, yabwiye Ibiro ntaramakuru Reuters ko aba banyamakuru "bikekwa ko bazi uburyo iyi videwo y’umukuru w’igihugu ariko yinyarira yagiye hanze".

Radiyo nkuru ya Sudani y’Epfo, South Sudan Broadcasting Corporation, ivuga ko itigeze itangaza iyo videwo.

Muthoki Mumo uhagarariye CPJ mu karere ka Afrika yo munsi y’Ubutayu bwa Sahara asaba ko barekurwa nta mananiza, akavuga ko ifungwa ryabo ryerekanauburyo“abashinzwe umutekano bitabaza gufunga abanyamakuru igihe cyose abategetsi babonye amakuru atabanejeje”.

Minisitiri w’Itangazamakuru muri Sudani y’Epfo, Michael Makuei, yabwiye Radio Ijwi rya Amerika ko abaturage bakwiye gutegereza bakamenya icyatumye aba banyamakuru bafungwa.

Amashyirahamwe aharanira uburenganzira bwa muntu akomeje kotsa igitutu abategetsi ba Sudani y’Epfo abasaba guhagarika itoteza n’iterabwoba ku banyamakuru.

Perezida Kiir yabaye umukuru w’igihugu wa mbere wa Sudani y’Epfo – igihugu gishya cya Afrika- mu 2011.

Ariko kuva icyo gihe, icyo gihugu cyakomeje guhura n’ibibazo byinshi, intambara zikaze, imidugararo ya politiki, ibiza ndetse n’inzara.

BBC