Muri Tanzania indege yari itwaye abantu 43 yaguye mu kiyaga cya Victoria kuri iki cyumweru kubera ikirere cyari kimeze nabi. Abagera kuri 19 baguye muri iyo mpanuka nkuko byemezwa n’inzego z’ubutegetsi.
Iyo ndege y’ikompanyi ya Perecision Air yaguye mu mazi ishigaje metero 100 ngo igere ku kibuga nkuko umuyobozi wa polisi mu karere William Mwampaghale yabibwiye abanyamakuru ku kibiga cy’indege cya Bukoba.
Komiseri w’akarere Albert Chalamila we yavuze ko abantu 43 barimo abagenzi 39 abapilote (...)

Sponsored Ad

Muri Tanzania indege yari itwaye abantu 43 yaguye mu kiyaga cya Victoria kuri iki cyumweru kubera ikirere cyari kimeze nabi. Abagera kuri 19 baguye muri iyo mpanuka nkuko byemezwa n’inzego z’ubutegetsi.

Iyo ndege y’ikompanyi ya Perecision Air yaguye mu mazi ishigaje metero 100 ngo igere ku kibuga nkuko umuyobozi wa polisi mu karere William Mwampaghale yabibwiye abanyamakuru ku kibiga cy’indege cya Bukoba.

Komiseri w’akarere Albert Chalamila we yavuze ko abantu 43 barimo abagenzi 39 abapilote babiri n’abakozi bo mu ndege babiri bari muri iyi ndege yari mu rugendo numero PW 494 ivuye mu murwa mukuru Dar es Salaam yerekeza Bukoba.

Minisitiri w’intebe w’igihugu cya Tanzania, Kassim Majaliwa, yavuze ko abayobozi bayo bemeje ko imirambo yose yakuwe mu ndege.

Ati: “Twatangiye gukuramo imizigo n’ibintu bwite by’abantu mu ndege. Itsinda ry’abaganga n’inzego z’umutekano batangiye inzira yo kumenya abapfuye no kumenyesha imiryango yabo."

Abashinzwe iyi ndege bavuze ko abantu 24 barokotse mu itangazo bashyize hanze ku mugoroba wo kuri iki cyumweru.Mbere y’aho byari byavuzwe ko abantu 26 muri 43 bari muri iyi ndege aribo barokotse.

Precision Air yagize iti“Precision Air irihanganisha cyane imiryango n’inshuti z’abagenzi n’abakozi baguye muri iyi mpanuka ibabaje.Kompanyi izaharanira kubaha amakuru nyayo ndetse n’ubufasha ubwo ari bwo bwose bazakenera muri ibi bihe bigoye.”

Amashusho yagaragaye ku bitangazamakuru byo muri Tanzaniya yerekanye igice kinini cy’iyo ndege cyaguye mu mazi abatabazi barimo abarobyi barimo kurohora abantu babatwara imusozi. Abandi bakozi bo mu butabazi bageragezaga guterura indege bakoresheje imigozi n’imashini ziterura imizigo.

Precision Air ni yo kompanyi y’indege nini kurusha izindi mu z’abikorera ku giti cyabo muri Tanzaniya. Yasohoye itangazo ryemeza ko iyo mpanuka yabaye.

Perezida Samia Suluhu Hassan yatanze ubutumwa bw’akababaro ku bari bafite abantu muri iyo ndege.