Perezida w’Uburusiya Vladimir Putin yemeje ku mugaragaro ihungishwa ry’abaturage b’abasivile bo mu bice byo mu mujyi wa Kherson wigaruriwe n’Uburusiya wo mu majyepfo ya Ukraine.
Abasirikare ba Ukraine bamaze igihe bakomeza gutera intambwe berekeza muri uwo mujyi w’ingenzi uri ku cyambu.
Putin yavuze ko abantu baba mu bice biri mu kaga bakwiye kuhava kuko "abaturage b’abasivile badakwiye kubabara".
Abantu batari munsi ya 70,000 basanzwe baratangajwe ko bamaze gukurwa i Kherson.
Uyu mujyi ni wo (...)

Sponsored Ad

Perezida w’Uburusiya Vladimir Putin yemeje ku mugaragaro ihungishwa ry’abaturage b’abasivile bo mu bice byo mu mujyi wa Kherson wigaruriwe n’Uburusiya wo mu majyepfo ya Ukraine.

Abasirikare ba Ukraine bamaze igihe bakomeza gutera intambwe berekeza muri uwo mujyi w’ingenzi uri ku cyambu.

Putin yavuze ko abantu baba mu bice biri mu kaga bakwiye kuhava kuko "abaturage b’abasivile badakwiye kubabara".

Abantu batari munsi ya 70,000 basanzwe baratangajwe ko bamaze gukurwa i Kherson.

Uyu mujyi ni wo murwa mukuru w’akarere wonyine wigaruriwe n’Uburusiya kuva abasirikare babwo batera Ukraine mu kwezi kwa kabiri uyu mwaka.

Putin yavuze ko abasivile bari mu byago byo kuraswaho no kugabwaho ibitero bakwiye "gukurwaho".

Yabivuze ku wa gatanu, ku munsi w’ikiruhuko w’ubumwe, mu rubuga Red Square rwo mu murwa mukuru Moscou.

Ukraine ishinja Uburusiya guhungisha ku ngufu abasivile b’Abanya-Ukraine - ibi bifatwa nk’icyaha cyo mu ntambara - nubwo Uburusiya bubihakana.

Ibitero bikaze bya misile n’indege zitarimo abapilote (drones) by’Uburusiya ku bikorwa-remezo bya gisivile mu bice bitandukanye bya Ukraine, byishe abantu biranangiza.

Byanatumye Ukraine igenda ihagarika umuriro w’amashanyarazi kenshi.

Amagambo ya Putin yakurikiye amakuru yo ku wa kane ko abasirikare b’Uburusiya, na bo, bari barimo kuva muri Kherson - icyaba ari ugusubira inyuma kw’abasirikare benshi.

Kirill Stremousov, umutegetsi washyizweho n’Uburusiya wo muri ako karere, yabwiye ibitangazamakuru byo mu Burusiya ko "bishoboka" ko Uburusiya bukura abasirikare babwo muri ako karere.

Abategetsi ba Ukraine bakomeje kwigengesera, baburira ko uko kuhava kwatangajwe gushobora kuba ari umutego wo gushuka abasirikare bayo ngo birare bajye mu turere duteje akaga.

Kherson yafashwe n’Uburusiya nyuma gato yuko buteye umuturanyi wabwo, Ukraine, ku itariki ya 24 y’ukwezi kwa kabiri uyu mwaka.

Ariko mu gihe cya vuba aha gishize, abasirikare ba Ukraine bakomeje kugenda bisubiza ubutaka bwo mu nkengero y’uyu mujyi.

Mbere, abasivile bari bashishikarijwe kuva i Kherson hagati mu kwezi gushize, mu gihe igisirikare cy’Uburusiya cyahinduraga ibintu muri uyu mujyi kigashyiraho uburyo bw’ubwirinzi.

Abakuru b’ingabo nyuma bavuze ko basoje igikorwa cyo guhungisha abatuye muri uwo mujyi, mbere yuko haba imirwano yitezwe kuhabera.

Uburusiya buvuga ko Kherson n’utundi turere dutatu twa Ukraine ari ubutaka bwayo, nubwo nta karere na kamwe muri utwo bugenzura byuzuye.

Bwateguye byihuse ayo bwise "amatora ya kamarampaka" kugira ngo bwemeze ibyo buvuga byuko ari uturere twabwo - igikorwa cyamaganwe mu mahanga.

Uburusiya bwaniyometseho umwigimbakirwa wa Crimea mu 2014 buwukuye kuri Ukraine.

Mu ijambo rye ryo ku wa gatanu mu rubuga Red Square, Putin yanavuze ko abantu 318,000 binjiye mu gisirikare mu gikorwa cyo gushishikariza abantu kwinjira mu gisirikare, ubu cyarangiye - barenga intego yari yihaye yo kwinjiza abantu 300,000 mu gisirikare.

Muri aba, Putin yavuze ko 49,000 ubu bari mu mirwano - uwo mubare ntiwagenzuwe mu buryo bwigenga na BBC.

BBC